August 2, 2023; Vawiin chawhnu khan Deputy Chief Minister, Tuichang AC bialtu ni bawk Pu Tawnluia chuan Khawzawl Zuchhip VengaRs. vbc 4.41 senga sak tur Multi-purpose Community Hall sakna tur lungphum a phum.

Lungphum phumna puala inkhawm tawi Khawzawl BNRGSK Hall-a neihah Deputy Chief Minister Pu Tawnluia chuan thu sawiin Multi-purpose Community Hall sakna tur lungphum phum a ni ta chu lawmawm a tih thu leh hei hi khawtlangin kawng hrang hranga an hman tangkai tur a ni, a ti a. Ram leh hnam a than zel nan khawtlang, vangtlang tana tangkai thil te sawrkarin a ngai pawimawh tih sawiin Multi-purpose Community Hall pawh hi mipui vantlang tana tangkai tur a ni, a ti.

Multi-purpose Community Hall hi chhawng thuma sanga sak tur niin, M/s Zothan Consultancy Services, Luangmual, Aizawl in an sa dawn a.  Ground Floor-ah Dawr siamna tur kaw 7 leh Inthiarna 2 a awm ang a, First Floor-ah Parking, Table Tennis Hall, Committee Room, Library, Recreation Room, Office, Kitchen, Store Room, Toilet awmin, Second  leh Third Floor-ah Hall, Green Room, Toilet 2 leh Store Room te a awm dawn a ni.