Aizawl: Aizawl Municipal Corporation a Deputy Mayor C.Lalsawivunga chuan nimin zing khan a bial chhung College venga AMC road siam mek a tlawh. AMC road laih mekah hian cheng nuai 15 sen ral tawh a ni a, hna hi mimal contractor kutah dah lovin AMC in a enkawl (Departmental work) a ni. Hnathawh nana sum ruahmansa awm lovin a tlachawpin thawh a ni.Dy.Mayor C.Lalsawivunga chuan, "College veng chuan hnuai lamah hian in 100 chuang zet an khawsa a, damloh ni khua leh rikrum thilah lirthei a lut lo rigawt hi tha lo kan ti a, khawtlang hruaitute nen theihtawpchhuahin remruatna fel tak nen hna hi bul tan a ni a, khawtlang mipuiten theihtawp chhuaha hnatlang nena an thawh thin avangin hnathawh phu lovin sum senso hi a tlem a ni," a ti. Dy. Mayor chuan tuna hna chu contractor kutah dah nise cheng nuai 68 bawr vel senna tura mithiam ten an chhut ah cheng nuai 15 chuah sen ral a ni tih a sawi a. Dy. Mayor chuan ruahman anga kawng hi siam a nih chuan kumtharah chuan lirthei kal theih tura peih fel a beisei thu sawiin kawngpui siam a nih theih nana compensation beisei lova mimal ram petu te chungah lawmthu a sawi nawn bawk.