Everton-in January thlaa Frank Lampard thlaka Sean Dyche-a’n an lak luh hlim khan a khelhpui hmasak vawi thumah vawi hnih a chakpui a, a hneh hmasak ber phei chu hmahruaitu, Arsenal an ni.

Lampard-a hova tlak hlauh vanga an insiksawi hlima an boruakah kha chuan tlak loh theih inbeiseina a lian hman a; mahse, tunah erawh an dinhmun a dang ta a, kum 72 hnuah a vawi khat nan English top flight football khel phak lo thei dinhmunah an ding mek.

Dyche hnuaiah hian Toffees hi tun hnai inkhel vawi 10-ah vawi khat chiah hnehna an chang a. Ningani zana Newcastle United-in Goodison Park-a 4-1 a an sawp leh hnuah phei chuan an dinhmun a derthawng ta hle.

Magpies tan Callum Wilson a la che tha tluang zel a, goal hnih thunin Joelinton leh Jacob Murphy ten goal khat ve ve an thawh a. Dwight McNeil-a’n Dyche-a team tana goal khat a thawh chuan awmzia a nei phak lo.

Everton hian khelh nga an la neihah 19-naah awmin Thawhtanni zan hian an chung chiaha awm, Leicester City chu King Power-ah an tlawh dawn a, hei hi an hmabak ‘inkhel pawimawh em em’ ni vek tawh, an him leh him loh hriltu tur inkhel bul an tanna a ni ang.

Hetih lai hian Newcastle erawh boruak sang takah an leng mek a, Pathianni zanah 6-1 in Tottenham an sawp tawh a, inkhel vawi hnihah goal 10 zet an thun ta a. Pathumnaah awmin season tharah Europe inelna sang bera inlan turin an insawh nghet zel a. Amahni umtu Manchester United tlansanin pangana, Aston Villa aia point riata an san tawh bakah khelh khatin an khel tlem zawk bawk.

Magpies hian Champions League an khel leh thei a nih chuan kum 20 zet hnua khawmualpui huap intihsiakna sang bera an inlan leh vawi khatna a ni dawn a, Eddie Howe-a leh a naute phur takin an kal mek zel.