DOWNLOAD OUR APP

Read latest news on your phone
app-store

e-office turin dept 4 in hna nghawrh

Oct 16, 2016

e-office turin dept 4 in hna nghawrh

Aizawl: November ni 1, 2016 atanga Mizorama a hmasa ber atana electronic office nih tum office pali, UD&PA Directorate, UD&PA Secretariat, Department of Information and Communication Technology leh Governor Office  ah tunlai hian inpuah chahna ngawrh taka neih mek a ni. He project atana Nodal Officer, R. L. Zidinga, Deputy Director (Plan) UD&PA chuan e-office in hna a ti awlsam dawn a ni tih sawiin, “ Hna a ti chak ang a, a confidential tha bawk ang. Draft siam mai a awlsam ang a, paper hman a tlem dawn avangin paper mana sum sen a tlem tawh ang,” tiin Zalen a hrilh a ni. ‘Paper file te tih tlem a ni ang a,  computer hmangin digital file in a tam zawk a kal tawh ang a. Computer in a inthawn kual zung zung theih tawh dawn,’ niin Zalen thutlakna chuan a sawi. IT Department System Analyst Vanlalringa chuan department dang atangin hman ve duhna pawh a awm \an tih sawiin, “Tunah hian department pali ah hian kan han hmang phawt ang a, harsatna lo awm zawng zawng sut kian phawt kan tum ang a, chumi hnuah felfai zawkin department dangte pawhin an hmang chho ve zel turah kan ngai,” tiin kan palai a hrilh bawk a ni. Heng office 4 a hman tur e-Office Lite software hi Rs Nuai 14.766 in NIC atangin lei a ni a. Hei hian a hmangtu tur office hnathawkte training na tur pawh a huam ang. He software hi State Data Centre ah bun a ni ang a, Department of Information and Communication Technology ten an lo enkawl dawn a ni. E-office software hi file khawih thei chin office staff te hman tura tih a ni a, Department pali te staff belhkhawm mi 136 te hman tura ruahman a ni. Zirtawpni khan NIC Delhi nen hmalak zel dan tur video conference neih a ni a, October ni 21-25,2016  inkarah staff training neih tura ruahman a ni bawk a ni. Secretariat nen pawh file an inthawn zung zung theih dawn a, lehkha bo a awm tlem tawh ang a, dawhkan a katlang tlem thei tawh dawn a ni.
Share now