ZALEN May 26, 2026 : Land Revenue & Settlement (LR&S) Minister B. Lalchhanzova chuan vawiin khan Lianchhiar Run Conference Hall-ah thu thar thehdarhtute kawmin, department hmalakna hrang hrang a sawi.

Minister B. Lalchhanzova chuan Mipui dawr awlsam nan 'e-ram Portal' tihchangtlun zel niin, e-ramah hian application 10,786 dawn a ni tawh a. Mi tinin rualkhai taka sorkar an chhawr theih nan e-rama process zawng zawng chu first come first serve tura ruahman a ni tih sawiin, "Duhsak zawng leh thil dang avanga hmanhmawh bikte lo process hmasak theih a ni lo," a ti.

Harsatna sukiang turin Whatsapp Bot (84158 06438) leh IVR siam mek a ni. State sum hnar tihchak nan e-Stamping hman tan a ni a, kum 2025-26 khan Stamps & Registration atangin Rs vbc 20.20 chuang hmuh a ni tawh. Online tax payment Version 2.0 pawh May 29, 2026 hian tlangzarh a ni dawn a, tuna hman mek Land Valuation 2015-a mi chu MZU Economics Department nen ennawn mek a ni bawk a ti.

Revenue Minister tarlan danin, dan leh hrai siamrem kawngah LR&S Act, 2013 chu August 2025 khan amendment siam a ni a, Prevention of Land Encroachment Act, 2026 pawh March 2026 khan Assembly-in a pawm tawh a ni. Chu bakah, Survey and Settlement Operations Act thar leh Apartment Ownership Act te pawh duan mek a ni bawk.

Revenue Department hnuaia dan siam te leh hmalakna thar a kalpui mek chungchangah, Assembly fur thutkhawma pass hman turin The Mizoram Survey and Settlement Operations Act 2026 buatsaih a nih thu te, hei bakah The Mizoram land Revenue Act 2013 hman lai chu tihdanglam tulna tam tak a awm tak avangin The Mizoram Land Revenue Act 2026 buatsaih mek a nih thu leh Apartment Ownership Act pawh duan mek a ni.

Inrelbawlna tihphuisui nan Surveyor 14 leh thawktu dangte lak belh an ni a, Surveyor 30 dang leh Revenue Field Worker (RFW) 10 lakna turin hma lak mek a ni. Tunah hian department hnuaia post awm zawng zawng 518 awmah a chanve 259 hnawh khah niin, a chanve 259 a ruak mek a ni.

Mipui tana awlsam zawk nan thuneihna sem zai kalpui niin, Aizawl Revenue District pawh North leh South-ah then a ni a; DC-te thuneihna pek belh niin, Vairengte leh Thenzawl Sub-Division-te thuam chak chhoh mek a ni bawk. Survey firm 13 te ruat an nih bakah Licensed Surveyor chhawr turin ruahmanna a kal mek a, thingtlang khaw tam zawkah Village Revenue Officer ruat tum a ni bawk.

Citizen Services lamah 'Bana Kaih' sum dawnin khaw thlan bikah ram survey mek a ni a; ramri khaw thenkhatah agriculture land record beihpui thlak a ni ang. 

Scheme pawimawh hrang hrang sawi bawkin, CM Land Reforms Package hnuaiah Rs nuai 500 hmuh a ni a; SVAMITVA scheme hnuaiah khaw 572-ah drone survey neih niin property card 40,000 vel pek chhuah an tum a, Mizoram chu hmarchhak state-ah a hmahruaitu a ni. 

DILRMP hnuaiah land record 3.61 lak zet digitize a ni tawh a, NAKSHA project hnuaiah Aizawl Municipal Council Ward 11-19 (veng 43) thlangin drone leh helicopter hmanga aerial survey thawk zo tawhin, ground truthing kalpui mek a ni.

Tlangkawmnaah Revenue Minister chuan, Revenue administration chu thil khawih harsa leh hun duh a nih avangin mipuite hriatthiamna a ngen a; zawi zawiin changtlung takin hma an sawn zel tur thu leh, mipui tana awlsam zawk, chak zek leh dawr nuam zawka service pek chhoh zel an tum a. Sorkar sum lak luh tihpun nan theih tawp chhuah chhunzawm an tum thu a sawi a ni.