ZALEN August 9, 2026: Electoral roll ennawn kal mekah inthun thar dil Mizoram pumah mi 30,652 an awm a, heng mite dilna hi tunlai hian enfiah mek a ni.

ZALEN-in Election department thawktute hnen atanga thu a dawn danin form 6 hmanga electoral roll-a lut/thun thar dil mi 30,652 zinga 9,169-te dilna chu chin fel (disposed) a ni tawh a, la chin fel loh (pending) 21,483 a awm mek.

Form 7 (roll atanga paihna) hmangin dilna lut 674 awmin 222 chin fel tawh a ni a, la chin fel loh 452 a awm bawk a. Form 8 (hming siam that, hmun danga insawn, kum siam that etc) hmangin dilna lut 20,870 awm bawkin heng zinga 4,016 chu chin fel a ni tawh a, la chin fel loh 16,844 a awm bawk.

Election department thawktute chuan tuna data an neih bakah dilna lut leh chin fel ngai hi khawih mek a nih avangin tuna data an neih pawh hi a la danglam leh thei tih an sawi.

Mizoram khawthlang lama inthun thar dil an tam chungchang zawhna chhangin election thawktute chuan thil awm dan uluk taka vil turin District Election Officer (DC)-te hriattir an ni tih an sawi a. Tun hnaia sawi hlawh tak, Mizoram khawthlang lama hearing nei tura kal official pakhatin zu a rui nia sawi chu Election Commission of India (ECI)-a thlen tawh niin sawn a ni dawn tih an sawi.

ECI-in final roll tar chhuah hun atana a hun ruat, September 6, 2026 chu Pathianni a nih avangin sawn an dil tih sawiin beiseina sang tak an nei tih an sawi bawk.