Aizawl: Vawiin April 22 hi Earth Day niin khawvel pumah ‘End Plastic Pollution’ tih thupuia hmangin hman a ni. Environment, Forest & Climate Change (EFCC) department chuan vawiin Earth Day hi Pathianni a nih avangin an hranpain program an siam dawn lo tih Zalen an hrilh a, hetih rual hian a theih ang angin thupui zirtirna hi pekchhuah a ni dawn tih an sawi. EF&CC hotute chuan Zalen zawhna chhangin kumin thupui plastic bawlhhlawh tihtawp chungchang chu a theih ang angin department hotuten Mizoram chhunga an division hrang hrangah zirtirna pek an tum niin an sawi a. A thenin thuchah an tichhuak ang a, school hrang hrangah programme siamin YMA leh tlawmngai pawl hrang hrangte leh, ramngaw humhalh kawnga thawk thin NGO hrang hrangte nen a theih angin thawhho an tum niin an EF&CC hotute chuan an sawi a. DFO zawng zawngte pawh an bial chhungah a theih anga hma la tura tih vek an nih thu an sawi bawk. EF&CC hotute chuan mipuite chu tawihral thei hmanrua hmang tam turin an ngen tih sawiin tunlaia tawihral thei lo no leh thleng kan hman nasat hian plastic bawlhhlawh a ti tam hle tih an sawi a ni. Earth Day thupui chu anmahni department chauh bakah mipuite leh sorkar department zawng zawng tanrualna tur a nih thu sawiin plastic bawlhhlawh titlem tura thawhho pui turin mipuite an sawm niin department hotute chuan an sawi bawk.