Earth Day hi kum 1970 atang khân kumtin April ni 22-ah an lâwm thinin an lo hmang thin a, a chhan chu kan khawvêl chauh hi nunna awm theihna awmchhun a ni a; mahse, a chhûnga chêng mihringte hian humhalh leh dim nachâng hre loin kan tichhe chho char char a, chênna tlâk lohin kan chhuah mai dâwn a, chu chu mithiamte leh environment lam tui miten hrethiamin theihtâwpa kan khawvêl hi humhalh leh vênhim a nih theih nân kumtin thupui pawimawh tak neiin khawvêl hian Earth Day hi kan lo hmang ta thin a ni. Khawvêl changkânna leh hmasâwnna hian loh theih loa kan leilung leh boruak a tihchhiat a tûl chângte pawh a awm ve thin a, chutih rualin hmasâwnna nia lang thenkhatte erawh hi chu a thil tihchhiat leh a hmasâwnna ken khaikhina tih lo mai tha zâwkte pawh a awm ve tho a, chuvângin uluk taka zir chiangin mithiamte'n kumtin thupui pawimawh tak nen Earth Day hi mipuite leh thangtharte zirtirna hun atân an lo duangin kan lo hmang ta thin a ni. Kumin Earth Day thupui atân pawh hian End Plastic Pollution tih an thlang a, khawvêlin he plastic bawlhhlawh hi a buaipui a, keini ram thang mêkte tân hian a pawimawh lehzual a, a chhan chu ram changkângte'n plastic bawlhhlawh avânga harsatna an tawh mêk hi pumpelh turin hun tha kan la nei thei a ni. Kan hriat angin plastic hi a zângkhai a, thil dangah kan mamawhna takah awlsam takin a siam zung zung theih a, man tlâwmtêa siam leh hralh mai theih a la ni lehzêl a, a siamtu tân hralh teuh theih niin a leitu tân lah tlâwmtêin lei teuh theih bawk si, kan khawsak a tiawlsamin a tinuam a, chuvângin tûn dinhmunah chuan kan hmang lo thei ta lo ni berin a lang. Heti khawpa tangkai leh awlsam si hi a tha loin kan chhiatpui mêk bawk si a, a thatna leh tangkaina lam aiin a that lohna lam hi kan chhiatpui nasa zâwk a, kan nunna atân hial pawh hian a hlauhawm chho ta hlê chu a nih hi. A chhan chu kan hman zawh hnûa kan paih mai hian tawih ral turin kum 100 atanga kum 600 chuang dâwn lai hun a duh a, thenkhatte phei hi chu a la tawih ral thei lo lehnghal a, a hlauhawm hlê a ni. Mizoramah pawh kan hmang nasa ve ta hlê mai a, thil fûnna polythene bag atân te, naupang toys atân te, kan in chhûng bungraw chi tinrêngahte pawh hian plastic chu a tel ta vek mai a, a samkhai zâwngin disposable thlêng leh no-ahte an la rawn siamchhuak zêl lehnghal a, kan mi thiamten a that lohna leh a hlauhawmna an sawi uara mipuite min zirtir tam hi a tûl lehzual ta a ni. Kan sawi tâk ang khân plastic-te hi a tawih hlei thei si lo a, mahse kan paih mai mai lo thei bawk si lo a, hman zawh tawh leh a chhe tawh nanana chu kawl rengin a hnawk ve tho bawk si a, bawlhhlawh dang angin kan paih ve mai a, an ral ve thei ta si lo hi buaipui chu a ngai ta hle chu a nih hi. Kan hmunhmâ leh kan chhehvêlah awmin khaw hawi tinuam lo khawpin min tilang tawp ta chu a nih hi. Leite pawhin chhilhin lei hnuai daihah pawh awm mah se a tawih theih miau loh avângin lei a tithâwlin a tinghet lo a, leimin nasa tak a thlen phah ta fo a, nunna chân phah hialte pawh kan awm a, kan inkal pawhnate chhiain kan ram leilung hian a chhiat phah nasa hlê chu a nih hi. Pawi deuh mai chu kan plastic paihte hi kan ran vulhte leh ramsate hian an hre hrang ve si lo a, an lo ei fo mai a, an thih phah thin a ni.  A chhan chu an pai tawih thei bîk lo a, a bîk takin tuia chêng thinte leh sava lian ho hian an thihpui nasa hlê a, a chhan chu an thil ei rêng rêng dawlh mai thin an ni a, plastic-te pawh an dawlh mai a, an pai tawih theih miau loh avângin an e chhuak thei tawh lo a, an thihpui thak zêl a ni. Mizoramah chuan kan chênna bul hnai kawr ruamahte bawlhhlawh kan paih tlângpui a, chu chuan kan luite a fin leh a, kan bawlhhlawh paihte chu luiah an lût ta thin tihna a nih chu. Chuvângin kan lui dungahte chuan plastic bawlhhlawh tam tak hmuh tur a awm phah ta mêk a ni. Kan Aizawl khawpui chhûnga kan lui neih hnaivai awm chhun Chite lui pawh tûnah hian sawrkârin dân khauh tak leh tha tak siamin a humhalh chho mêk a, pâwl hrang hrangte pawhin a hmunah kalin an tifai a, bawlhhlawh awm ang angte an chhar a, a paihna turah motor-in an paih thin a, amaherawhchu vawiinni thlengin Chite lui hi a fai hlei thei chuang lo a, a hranpâa Chite luia bawlhhlawh zu paih ta vang vang hi chu kan awm miah lo; mahse, a bawlhhlawh zêl hrih tho a, a chhan chu kan in bul leh kan vêng chhûng kawra bawlhhlawh kan paih thinte hi ruah sûrin Chite lui lamah a lên thla zêl a, a bîk takin Chite lui vênhimna leh enkawl faina kawngah hian a vêng hnaivaia mite hian mawhphurhna lian tak kan nei a ni. Plastic bawlhhlawhte hi han tihral dân tur leh thehthang dân tur hi a vâng hlê mai a, paih mai chi a ni bawk si lo a, hâl ral mai chi lah a ni hek lo. A chhan chu plastic hâl hian boruak a tibawlhhlawh nasa hlê a, mihringte hrisêlna tichhe thei gas chi hrang hrang hi thil dang hâl aiin plastic hâl hian a tichhuak nasa bik a ni. India sawrkârin kum 2016 March ni 18 khân Plastic Waste Management Rules, 2016 a lo siam tawh a, he dân hian plastic bawlhhlawh siamchhuah kawnga mawhphurtu tû pawh mi mal emaw pâwlho emaw, khawtlâng hruaitute, plastic kaihhnawih siamchhuaktute leh chaw lûttute a huam a, sawrkâr Department hrang hrangte mawhphurhna leh an thuneihna te, phalna neih theih dânte leh a hun taka report theh luh tur a nih thute a awm a, pawimawh deuh chu he dân hian ei tur lam chi fûn nân leh vawn that nân plastic lam chi hman hi a khap tlat a ni. He dân kimchang hi a duh tân Mizoram ENVIS Hub website www.mizenvis.nic.in-ah download theihin a awm a ni. Plastic bawlhhlawh tibo tur hian plastic lam chi rêng rêng hman loh tur a ni mai a, kan khawsak tizângkhaitu leh tiawlsamtu a ni mai a, a thlâkna tur emaw hman tur dang emaw kan zawn mai hi a tha a, khawvêl ram thenkhatahte phei chuan plastic lam chi hman hi an khap nual tawh a, entirnân plastic atanga siam polythene bag hmante hi an khap fur tawh a ni. Tin, loh theih loha kan hmang duh tlat a nih pawhin rawng nei lo chi, a fîm chauh kan hmang tur a ni a, rawng nei chi hi chu a hlauhawm tih i hre thar ang u.