Aizawl April 16, 2023 :  Election Commission of India chuan Mizoram People’s Conference party pawmpuina (recognition) a titawp a. Recognise party a nihna nei let leh ngei tura beih an tum thu an president, Vanlalruata chuan ZALEN a hrilh.

Election Commission of India chuan April 10, 2023 khan thuchhuah siamin MPC chu recognition an nihna tihtawp a nih thu a tar lang a ni.

MPC recognition tihtawp a nih chungchangah MPC president chuan, “MLA inthlan lo awm turah nasa taka tan lain recognition neih leh ngei kan tum dawn a ni,” a ti a. Election symbol atana electric bulb an hman thin chu a theih tawh dawn lo nia sawiin free symbol-a mi eng emaw an thlan a ngai dawn niin a sawi bawk.     

Recognise political party ni tur hian MLA leh MP (Lok Sabha) inthlana vote tla atanga 6% hmu pha emaw, MLA/MP nei nih a ngai a ni.