Aizawl: ZPM party-in Representation of the People Act, 1951 (RP Act) Section 9 (A) bawhchhiaah Robert Romawia Royte puha minister/MLA atanga bân tura Mizoram larsap an ngenna chu March 16, 2023-ah Election Commission of India (ECI)-ah thawn ni tawh mah se, ECI atangin chhanna dawn let a la awm lo. Hetih lai hian ZPM party chuan tun kar chho-ah an ngenna a hlawhtlin ngei theihna turin hmalakna lian tham neih an tum.

Secretary to Governor V. Lalsangliana chuan ECI Principal Secretary SB Joshi hnenah tun hnai khan lehkha thawnin, ZPM Vigilance Department General Secretary SL Ngursailova Sailo-in Robert Romawia Royte bân tura a ngennate chu thawn chhawng an nih thu leh lo zir chianga an ngaihdante sawi leh turin a ngen.

ZALEN thudawn danin Mizoram larsap leh bân tur a lehkha thehluh hming tumtu, SL Ngursailova ten ECI atangin chhanna dawn an la nei lo a, hetihlai hian ZPM party chuan tun kar chho-ah hian MLA atanga Robert Romawia Royte bân a nih ngei theihna turin central sawrkar leh ECI beng thleng pha khawp hmalakna neih an tum.

Media hrang hranga tar lan tawh angin, ZPM chuan SL Ngursailova hmingin February 28, 2023 khan governor hnenah lehkha an thehlut a, minister/MLA atanga Robert Romawia Royte bân turin an ngen a ni.

ZPM-in RRR-a dinhmun an tar lan dan

# North East Consultancy Services (NECS) neitu a ni.

# Chhiah pawh GST hnuaiah return a la file a ni.

# NECS chu duhsakna uchuak tak hmangin Mizoram sorkara District Council & Minority Affairs department nen single source selection hmangin deed of agreement an ziak.

# NECS chu proprietorship, mi mal sumdawnna a nih angin, a neitu leh hlawkna teltu chu Robert Romawia a ni.