ZALEN July 07, 2026 : ZPM thalai Vice president Isaac Lallungawia Rokhum chuan vawiinah khan Aizawl Press Club ah chanchinbu mite kawmin Economics & Statistics building chu a sak hna a chhiat em avangin siamthatna atana ZPM Sawrkarin cheng vaibelchhe 2,01,30,637/- a seng chu ZPM Thalai General Headquarters chuan tlawmthlak an tih thu a sawi.

Isaac Lallungawia chuan Mizoram State Project Monitoring Committee (MSPMC) Inspection Report tarlan danin, building hi a him tawk lo a ni tih MNF Sorkar lai kum 2022 khan hmuhchhuah a lo ni tawh a. PWD Quality Control Division-in Non-Destructive Test (Rebound hammer) hmanga an enfiahnaah, concrete chak zawng M20 grade tling turah M10 pawh a phak lo tih finfiah a nih thu a sawi. 

PWD E-in-C hlui Bowman-a pawhin "Structure Failure" leh chhiatrupna thleng thei warning "sheer crack" a awm hmuin Retrofitting ti vat turin a lo hriattir tawh a, mahse MNF sawrkar khan an Minister hlui Robert Romawia hmingchhiat thup nan hma an la zui duh lo lovah an ngai tih an sawi.

MSPMC leh Accountant General (AG) Audit Report zirchiannaah, dan leh inkaihhruaina zawm miah lovin Vaibelchhe 6 senga building sak hna hi NECS hnenah pek a ni tih tarlan a ni a. Third party monitoring leh measurement (tehna) pawh la miah lovin bill hi pek chhuah tawp a ni chu ZPM Thalai chuan eirukna lian takah an ngai an ti.

ZPM Thalai General Headquarters chuan Director hnenah DPR leh Drawing-te dil mah se, Economics & Statistics Department hian hetiang document pawimawh an nei miah lo hi mak an tih thu leh, Congress sawrkar lai ațanga puanhnuai thil dik lo a awm an rinhelh thu an sawi bawk.

MSPMC chuan thil diklo finfiahna (evidence) hmuh tur a awm kim tawh avangin Contractor (NECS/Robert Romawia Royte) pawh dan anga hremna lek ngei a tul thu sawrkarah a thlen a, ZPM Thalai chuan zaa za in an thlawp a, ram leh mipui nunna tana hlauhawm khawpa hna thalo thawktu leh eirukna liana inhnamhnawih te chu an phu tawk hremna pe ngei turin sawrkar an phut a ni an ti.

MINECO-a Economics & Statistics Directorate building hi 2014-2016 chhunga NECS, Aizawl ten 'turnkey basis' a an thawh nia report a ni a. Kum 2016 khan NECS hian sa zovin, Directorate of Economics & Statistics Department-ah hian an hlan a ni.