Ed Sheeran-a hla rutu hacker pakhat chu a thil tih avangin thla 18 chhung lungin tang tura hrem a ni. He hacker hi Ipswich-a cheng Adrian Kwiatkowski a ni a, Ed Sheeran hla a ruk hnuah a hralh zui avangin thiam loh chantir a ni ta a ni. 

English singer Ed Sheeran-a hlate hi la release loh an ni a, hacker hian ru chhuakin dark web hnenah a hralh a ni. Kwiatkowski hi  thubuai 19 zet awrh tir a ni a, chung zingah chuan copyright infringement pawh a tel. Hei bakah hian mi property ruk sak a, an phalna loa hralh thubuai pawh a tel a ni. 

London Police te chuan Kwiatkowski hian hla a hralhna atang hian £131,000 a hmu tih an sawi. Ipswich Crown Court chuan pawikhawihtu hi a Apple Mac laptop endik sak a nih thu leh, dan kalha a neih audio file 565 zet an hmuchhuak tih an tarlang. Chung zingah chuan Ed Sheeran leh Lil Uzi Vert  hla pawh a tel a ni. Kum 23 mi Adrian Kwiatkowski hian American rapper Lil Uzi Vert hla pawh eng emaw zat a ruk sak a ni.