Tun hnaia Union Public Service Commission in Civil Service Examination 2022 result a tihchhuah ah Mizoram atangin beiseina sang tak nei mah ila vanduaithlak takin tling an awm lo a. Hetih lai hian hmarchhak state dang te atang chuan tling an awm nual nia hriat a ni. Mizoram atang hian kum 2014 hnuah IAS tling an la awm lo a, IPS a tling hnuhnung ber pawh kum 1991 kha a ni. Heti tak maia India hnasang thawk tura kan tling thei lo ta mai hi chhuichian a ngai hle mai.

Civil service a Mizote tlin theih loh chhanah hian ngaihdan hrang hrang leh a chhan hrang hrang a awm thei ang a. Mi thenkhat chuan state service te dinhmun leh hamthatna nasa lutuk hian central service a thawh hi an awt lo niin an ngai a, hei hi a dikna chen thui tak a awm thei ang.

Mizote IAS leh central service-a kan tlin theihnan sawrkar hmasa hun atang tawh khan Mizoram Youth Commission chuan hma an la a. Tun sawrkarah ngei pawh New Delhi a academy tha zawkah te intirin sum leh pai pawh an seng tam hle a ni. Mahse vawiin thlengin a hlawhtlinna kan la hmu lo thung.

Kum heti zat kan lan loh chhanah hian Mizo thalaite hian IAS leh central service nih tumna tak tak a awm ta lo em ni aw tih mai awl rum rum khawpin HSLC leh HSSLC lama titha deuh te chuan Engineer leh Doctor lam an hawi zel a. Zirlai thiam thei vak lo a ngaih ten civil service lam hi an hawi ta mai em ni tih mai pawh a awl.

Heti tak maia civil service ah Mizote kan tling thei lo ta mai hi a mak a, tribal quota hnawhkhat tu zinga kan lang ngai ta lo te hi a zahthlak a ni. Kan rama zirna kan kalpui dan leh syllabus te hi ennawn a ngai ta mai em ni tih pawh zawhna awm thei a ni. 

Mizote hi hnamdang te aia kan hniamna bik a awm lo a. Tunhma lam te phei chuan tribal quota hnawhkhattu zinga a tam ber te pawh kan ni hial thin anih kha. Mahse tunah erawh chuan kan lang ngai ta lo thung. Central service chi hrang hranga kan lan theih loh chhan hi sawrkar hian chhui se, kan damna ngei tur damdawi pawh hmuhchhuah tum ngei teh se.