Mizoram sawrkar hnathawk inzawmkhawm pawl Federation of Mizoram Government Employees & Workers te tunhnaia khawmpui chuan an thurel zingah 'Mizoram sawrkar hnuaia sawrkar hnathawk ten a hun taka hlawh kan lak theih nan, FMGE&W in chak zawkin hma la rawh se' tih an rel a. FMGE&W khawmpui hmanpuitu Chief Minister Zoramthanga chuankhawmpui ah hian thu sawiin Covid-19 hri leng avanga central sawrkar atanga sum a dawn tur Mizoramin a hmuh theih tak loh avangin tun thlengin sum harsatna a la awm ta zel tih a sawi a. State sawrkarin sum leh paia harsatna a tawh chu sutkian a nih theih nan sawrkar laipuiah hma an lak mek zel thu a sawi bawk a ni.

Mizoram hi kan hriat angin sawrkar laipuia in nghat kan ni a. Kan state in thawhchhuah tih tham kan neih ve loh avangin sawrkar laipui atanga sum kan hmuh that hi a ngai a. Hun hmasa lamah te phei kha chuan chuan central a tlatlum thei leh sum sawichhuak thei nih te kha kan au hla a niin 'Central fa tlum' tih te kha a lar hle thin anih kha.

Kan state kalphungah hian a hma chuan kan sum neih ang ang CSS leh thildang te kha sawrkar hnathawk hlawh ah kan lo hmang puk mai thin a, chu chu thla thara sawrkar laipui in sum min rawn pek hmangin kan rul leh mai thin a ni. Mahse khatiang kha central lam hian an phal tak loh avangin thawhchhuah nei lo state chuan thla thara sum lo kal kha nghah a ngai ta thin a, a hmaa thla tawp ber ni emaw thla thar ni hmasa ber emaw a hlawh lak thin kha a theih ta lo niin a lang. 

Mizoram ang thawhchhuah nei lo state ah chuan sawrkar hnathawk hlawh hi kan in nghahna a ni lo thei lo a. Sawrkar hnathawk ten hlawh an lak loh chuan sumdawng te an inhralh thei lo a, pawisa leng vel a tlem avangin chhungkaw tin hian kan tuar vek ta mai a ni. Sawrkar hnathawk ten a hun taka hlawh lak an beisei hi an tih tur awm tak a ni a, sawrkar pawh hian an harsatna hi hriatpuiin a hun taka hlawh an lak ngei theihnan theihtawpin tan la chho zel se a duhawm hle.