Mizoram Governor Hari Babu Kambhampati chuan tunhnai khan Mamit tlawhin JNV school sak mek chu a hmunah a tlawh bawk a.  Chak zawka hna kal mek thawh dan tur contract hna viltute leh District official te a sawipui a ni. Governor hian JNV sak hna viltu engineer te leh a sak hna thawktu contractor te hnenah sak zawh thuai a nih theih nan chak taka hma la turin a hrilh a. Furtui tam leh kawngchhia chu in sak hna muan lutuk chhanah puh a fuh lo a, Mizoram sik leh sa hrechiangtute chuan an hnathawh hun chhung leh tanlak hun tur te chiang takin an hre sa vek tih a sawi a ni.

Governor thusawi hian ngaihtuah a ti thui a, inenfiah a ngai hle tih a lantir a ni. India ram democracy kalphungah chuan hmasawnna hnathawh enzui leh vil kawngah Governor te hi an inrawlh meuh lo a, state ah constitutional head an nih angin ram danpui pela thiltih a awm leh awm loh te an en thin zawk a ni. Mahse hetia Governor meuh a tawngchhuak hian hnathawh muang thin lutuk a veizia a tarlang a, a lawmawm zawnga kan dawnsawn a pawimawh hle.

Governor sawi ang hian fur ruahtui tam hi kawnglai leh hmasawnna hnathawktu te chhuanlam a ni fo thin a, mahse tih tak taka tih chuan hei hi chhuanlam dawrawm tak a ni thung. Mizoram hi kan hriat angin monsoon area a awm chu kan ni ngei a, mahse kum khat chhunga hnathawh theih loh thla hi chu tlem te a ni. Ruahtui hi a tlangpuiin May thla velah a tla tan thin a, mahse fur kan tih tak tak hi chu July atanga September hi a ni ber. Ruahtui tlak dan erawh hei aia hmaa a tlak tum leh fur a rei deuh tum te awm bawk mahse hnathawh theih loh hun hi chu a rei berah thla 4 vel chauh a ni. Chuti anih chuan kum khatah thla 8 chhung vel hi chu hnathawh theihna hun a awm tihna a ni.

Kan rama hmasawnna hnathawktu tam ber hi chuan ruahtui a tlak zawh hnuah te ngaihtuahna an seng tan chauh em ni aw tih mai tur hian an awm a. Hnathawh harsat hun lai te hian ngaihtuahna lo sengin hma lo la tan se chuan kum khatah thla riat chhung October atanga May thla hi chu hnathawh theihna hun tha a awm a ni. He hun hi chhawr tangkai ila chuan kan hnathawh hi a chak lehzual ngei ang.

Kan ram lu ber Governor meuhin hnathawh muang lutuk a vei hi a lawmawm tak zet a. A hun taka hna kan zo lo fo hian senso a ti sang a, chumai bakah a zahthlak bawk a ni. A chang phei chuan contractor te hian revise an duh avangin a hun takah hian an zo duh lo em ni aw tih mai a awl rum rum thin. Governor thusawi hi inenfiah nan leh tanlak nan hman ngei i tum ang u.