India Republic Day lawmna ah Governor chuan Mizoram khawpui hrang hrang te faina kawnga an inelna result puangin lawmman a hlan nghal a. District capital ah Khawzawl chu pakhatna niin urban town ah Ngopa leh Aizawl khawpui ward fai berah Ward XVI te thlan an ni.

Sawrkar laipui chuan faina hi a ngai pawimawh hle a, Swachh Bharat Mission tih hming vuahin pawn leh khawlaia inthiar tam lutuk chu ngaimawhin chhungkaw tinin mahni ek in an neih theih nan hma a la a. Mizoramah pawh he thil hi kalpui a niin pawna inthiar awmlohna 'ópen defecation free'ah puan a ni ta a. Hei mai hi duh tawk lovin odf plus ni turin hmalak mek zel a ni.

Mizoramah pawh khawpui fai inelna hi neih a niin AMC Ward 19 te bakah district capital 10 leh urban town 17 te chuan inelna an nei a. Ministry of Housing & Urban Affairs in khawpui fai endikna 'Swachh Survekshan'zulzuiin Mizoram khawpui hrang hrang te hi nikum tawp lam khan endik an ni.

Mizoram khaw hrang hrang zingah hian chhimlam leh khawthlang lam khaw thenkhat tih loh chuan an fai tlangpui hle a. Hetih lai hian khawpui ber Aizawl erawh khaw dangte ngaihtuahin a la bal hle mai. 

Thingtlang leh district khawpuiah te faina kawnga nasa taka hma an sawn laiin Aizawl ah erawh vantlang inthiarna hmun te, puipunna leh luikawr te a la tawp hle. Khawpui tlangdung chu zingtin phiah thin anih avangin a lang nalh viau a, hetih lai hian a bul lawk kawr ah te chuan bawlhhlawh a inchhekkhawl nghek nghuk mai thung a ni.

Khawpui ber Aizawl a la bal hle mai hian ngaihtuah a ti thui a. Aizawl mipuite hian faina kawngah nasa taka hma kan lak a ngai a, thingtlang lam zirtirtu leh entawnah te hian awm thei ila a duhawm hle. Thingtlang lam zawk te pawh an fai theih laia mi changkang zawka ngaih te khawsakna Aizawl a la tawp viau mai hi chu a zia lo khawp mai, tan kan lak lehzual a ngai tih hre nawn ang u.