Aizawl Municipal Corporation (AMC) hotute leh Police te chuan Zirtawpni khan Thuampui leh Falkland inkar vending zone ni loa thlai leh thei zuarte chu tiam chin awm loa inzuar tawh lo turin hriattirna an pe a, sumdawngte erawhin AMC atangin vending licence an nei tih an sawi a. Mahse AMC official leh Police te chu dan loa thei leh thlai zawrhna hmuna sumdawngte chu inkhar turin hriattirna an pe nawn a, an in sakte pawh pawh thiat turin an hriattir bawk a ni.

Hetih lai hian Thuampui leh Falkland inkar kawng sira thei leh thlai zuar Vendors intelkhawm pawl chuan an inzawrhna hmun chu AMC in kum 2020 khan dawr hawn phalsakna an pek chhuah thute, vendor licence pawh kum 2021 ah an pe a. Thuampui Local Council hnenah dawr luah man thla tin Rs.500 an chhun luh thin thu bakah loan laa an eizawnna chu kalpui an nih thu te, chhungkaw ei bel ber an nih vek thu te an sawi bakah AMC in hmun dang a ruahman sak a nih loh chuan tuna inkhar nghal mai chu an tan a ngamawm loh thu an sawi ve thung.

Aizawl khawpui enkawltu AMC hian a theih ang angin hma a la a. In sak dan him zawk a awm theihnan building regulations te a siam a, lei laih phal loh hunte siamin faina kawnga mipuiin hma kan sawn zawkna turin bawlhhlawh paih leh thliar kawngah te nasa takin hma a la mek a ni. Hetianga hma a la chunga thupek zawm lo leh harsatna siam an awm fo mai hi a vanduai thlak hle. 

AMC hian mipui nawlpui tana tha leh him zawk a awm theihna atan hma an la mek a, mahse heti chung hian in sak kawngah pawh dan dinglai awmsa reng palzut lui kan awm tlat mai te hi a pawi hle a. Phal lohna hmuna lei lo lai lui tlat te, kawng leh thenawmte nek ran leh hlauhawm taka in sa lui tlat te, AMC Engineer-te drawing ang ni loa in sa kan la awm tlat mai te hi a vanduaithlak hle a ni. Mi thenkhat chu dan dik lo a ni tih hrereng chung leh pawisa chawi theihna a ni tih hre reng chunga in kan sa lui zel te hi a pawi hle a ni.

Thuampui leh Falkland inkara thei leh thlai zuar chungchangah pawh hian thil awmdan a bulthut atanga chhuichian a tha hle mai a. Thei zuarte sawi anga AMC hian phalna a lo pe anih chuan AMC hian an ti dik lo tawp tihna a ni a, an awmna tur hmun dang ngaihtuah sak an ngai tihna a ni. Chutiang bawkin thei zuarte hian dan phal loh a ni tih hre reng chunga hmun remchanga an lo in valh ve mai a nih pawhin an ti dik lo tihna a ni bawk ang. Engpawhnise tuna helai hmuna thei zuarte inphona hmun hi thil zuar tan chuan hmun remchang leh sum hmuhna tha tak ni mahse mipui tam zawk daih tan chuan an hnawk hle thung. Chuvangin mahni chauh inngaihtuah lovin mipui nawlpui tan kan thiltih hi a him em, midang tan harsatna thlentu kan ni thei em tih ngaihtuah chunga thil kan tih zel hi a pawimawh tih hre thar ang u.