Tunhnai khan Chief Minister Zoramthanga chu a chenna bungalow ah 23 Sector Assam Rifles Commander thar Brigadier Girish Upadhyay SM, VSM chuan a hmu a. He an inkawmna ah hian Chief Minister chuan Assam Rifles te chu an hmun thar Zokhawsang ah a hma thei ang bera insawn tur a duh thu leh hemi atana hma la tura a duh thu a lo hrilh a. Brig. Girish Upadhyay pawhin Assam Rifles chu Home Ministry thu angin insawn tur tho tho a nih thu te, a rang thei ang ber a insawn fel theih nan leh tuna an hmun chhuahsan tura Laldenga Centre leh project dang te a hma thei ang bera hmalak a nih theih nan amah pawhin theihtawp a lo chhuah tur thu a sawi a ni. 

Assam Rifles te hian Aizawl hmun laili leh pawimawh lai tak mai an luah mek a. Zokhawsang ah hian insawn tura hmalak a niin insawn mai tura an lan laiin eng emaw harsatna neuh neuh a awm nge ni vawiin thlengin an la insawn thei lo a, an insawn loh chhan pawh sawi dan a in ang lo lo. Engpawhnise a bul berah chuan AR te hian insawn an hreh a, tuna an awmna ah hian awm chhunzawm zel an la duh niin a lang.

AR insawn chungchangah hian sawrkar pawhin nasa takin tan a la a, a bikin MNF sawrkar phei chuan hma a la nasa lehzual a ni. AR te hi an la chhuak ngei turah ngai ila, hetia an chhuak mai lo te pawh hi a tha zawk ni hialin a ngaih theih a. Tunhma deuh te khan lo chhuak ta se a, ram hi mi thiltithei deuh ten an LSC zo mai lovang tih pawh sawi har tak a ni. 

Tunah chuan mipui pawh kan harh lehzual ta a. AR ram chhuahsan tur pawh hi sawrkarin mipui tan tangkai takin a hmang ngei ang tih beisei ila, sawrkar hmalakna thlir zel phawt ang u. AR chungchang hi politics ball ah kan lalut laklawh tawh si a, tuna sawrkarna chelh mektu party hian inthlan hmaa an sawnchhuak thei anih chuan an thatpui thei a, an sawn lo anih erawh chuan sawifiah ngai an ngah hle in a rinawm thung.