Hun engemaw chen political party ten auhla leh inbeihna atana an hman Assam Rifles te Aizawl khawpui laili atanga sawnchhuah chu a takin a thleng dawn hnai niin a lang a. Zirtawpni khan Chief Minister Zoramthanga hovin CM Conference Hall ah April ni 1, 2023 a Union Home Minister Amit Shah lo kal tur chungchang leh hemi kaihhnawiha Zokhawsang a Assam Rifles hmun a hawn tur te sawiho a ni a. Deputy chief minister Tawnluia pawhin Zirtawpni khan Lunglei ah chanchinbumite kawmin Assam Rifles te chu Aizawl atangin Zokhawsang ah in sawn turin an in thiar chhuak tan mek tih a sawi bawk.

Assam Rifles te insawn tur hi a lawmawm a, tuna an awmna tur Zokhawsang hi tun dinhmunah chuan a tha tawk a ni mai thei a. Mahse nakin lawkah chuan khawpui than zel dan thlirin hei aia hla deuhah suan ni se a duhawm hle. Chutih rual chuan Assam Rifles te hian insawn hi an duh bikin a rinawm loh a, Zokhawsang ah hian insawn tura tih ni mahse insawn loh dan hi an zawng ve ngar ngar niin a lang a, tun dinhmunah chuan hei bak hi chu a buaithlak hrih deuh niin a lang. Assam Rifles te hian kan khawpui laili a hmun zau tak mai an luah avang hian mipui pawhin hnawk kan ti a, an hmunhma hi chhuahsan se, tangkai taka hman nise tih kan duh a ni.

Chutih rual erawh chuan mipui hian hlauh ruk an nei a, Assam Rifles ram hi mi thiltithei ten an insem zo mai ang tih hi an hlau ru zek zek a ni. Mi tam tak chuan hetia AR ten an ram an luah tlat mai hi tha zawk hle in an ngai a, chuti ni lo sela chuan tute emaw politician leh thiltithei deuh ten an insem zawh mai a rinawm.

Assam Rifles sawnchhuah kawngah chuan rorel lai MNF sawrkar hi an fakawm tak zet a. Chutih rual erawh chuan AR chhuahsan ram hi hman tangkai a ni dawn em tih leh engtia cheibawl nge a tum tih hi mipuiin an thlir reng dawn a. Sawrkar hian tangkai taka a hman chuan nakin thlengin fak leh hriatreng a hlawh ang a, a hmang tangkai lo anih chuan thangtharte sawisel leh dem a hlawh reng dawn a ni.