DOWNLOAD OUR APP

Read latest news on your phone
app-store

Editorial : AR sawn chhuah hi

Aug 07, 2022

Sawrkar laipui pawh hian Mizo mipuite duhdan hi hriain Aizawl khawpui laili atang hian Assam Rifles te hi min sawnchhuah sak thuai teh se

MNF party hi Aizawl khawpui laili atanga Assam Rifles te sawnchhuak tura hma latu ver an ni ti ila kan sawi sual awm love. MNF sawrkar hmasa ber kum 1987 khan an buaipui hle a, July 1987 khan Zokhawsanga insawn turin an tifel a. Zokhawsanga ram neitute ram an laksakna man (Compensation) Rs. 92,59,156.00 pawh an pe fel nia hriat a ni. Kum 1998 a MNF kaihhruai an lo sawrkar leh pawh kha nasa takin AR te sawnchhuak tur hian an buaipui a, mahse an term chhungin an sawn chhuak thei lo a. Kum 2018 a MNF sawrkar lo din leh atangin nasa takin hma an la leh a ni.

Assam Rifles sawnchhuah chungchang hi Dy. Chief Minister Tawnluia chuan kumin May thla khan Union Home Secretary hi a chamber-ah a lo sawi pui tawh a. Chumi bawhzuiin Chief Minister Zoramthanga Chamber-ah Assam Rifles hotu te nen sawihona neih a lo ni tawh bawk a ni. Ningani tlai khan Union Home Secretary Ajay Kumar Bhalla Office Chamber, New Delhi-ah Speaker Lalrinliana Sailo hoin Aizawl khawpui laili atanga Assam Rifles te sawn chhuah dan tur leh thil pawimawh dang sawiho leh a ni a. Meeting-ah hian Assam Rifles te insawn chhuahna tur order chhuah a nih tawh hnuah tun thlenga an la chhuah loh thu leh a taka an chhuah a tul tawh thu te Mizoram team te hian an sawi a. Parliament Monsoon session zawh hnuah order thar chhhuah a nih tur thu Union Home Secretary chuan a sawi a ni.

Assam Rifles te hian tuna an awmna hmuna awm reng hi an duh a, chhuah loh hram hram dan leh awmzui zel dan hi an ngaihtuah reng a ni. Chuvangin sawrkar laipui, Home Ministry pawh hian chak takin hma a lakpui duh lo emaw ni chu aw a tih theih rum rum hial. Assam Rifles te hi chhuak ta se chuan tuna an awmna hmun hi kawngpui tihzauh nan nen thil tangkai ah hman a ni dawn a, chuvangin mipuite chuan an chhuah hlan hi an nghakhlel hle a ni.

Chutih rual erawh chuan hetia AR ten Lammual leh a chhehvel an awp reng laia mi eng emaw zatin LSC an nei thei erawhin ngaihtuah a tithui a, AR te hi tunhma deuh khan lo chhuak ni ta se an luah ram hi mi thiltithei deuhten an insem zo mai ang tih a hlauhawm hle. 

Assam Rifles sawnchhuah chungchangah hi chuan MNF hi a tir atanga hma latu an ni a. Tuna an awmna tura ruahman Zokhawsang pawh hi a la hnai hle chuan a hriat a, mahse tun dinhmunah sawnchhuah ngei kan duh si avangin hei aia hmun remchang, an awm duhna tur hi a awm mai loh avangin a tha tho ah ngai ila. MNF hian nakum MLA inthlanpui neih hma ngei hian AR te hi khawpui laili atang hian sawnchhuah ngei tum se, an hlawhtling anih ngat chuan mipui ah pawh an dinhmun a san phah sawt dawn a. An hmalakna hi mipui ten kan thlir reng a. Sawrkar laipui pawh hian Mizo mipuite duhdan hi hriain Aizawl khawpui laili atang hian Assam Rifles te hi min sawn chhuah sak thuai teh se.

Share now