Kar kalta khan Chief Minister Lalduhoma chuan chanchinbumite kawmin Aizawl khawpui laili atanga Assam Rifles sawnchhuahna turin inremna ziah a nih thu a sawi a. Assam Rifles te Zokhawsanga an insawnna tur inremna (Memorandum of Agreement) hi October ni 23,2024 khan New Delhi-ah Assam Rifles leh Mizoram sawrkar aiawh ten Mizoram House-ah an ziak tih sawiin Mizoram sawrkar aiawhin Secretary to CM Vanlaldina Fanai leh Assam Rifles aiawhin Director General, Vikas Lakhera’n a ziak niin a sawi.

Chief Minister chuan Assam Rifles building chhuahsan tura chhiah lak tur te chu nakum April thla ral hmain Assam Rifles hnenah Mizoram sawrkar chuan a pe dawn, a ti a. Assam Rifles-in Mizoram sawrkar hnena a hlan, ram leh building te chu Mizoram (Restriction on Use of Transferred Land) Act, 2022 sawi angin mipuite tana hman tur a ni tih a sawi.

Aizawl khawpui laili atanga AR sawnchhuah hi Mizo mipuite hian kan duhin sawrkar mek leh sawrkar kal tawhte pawhin sawn an nih theihnan hian theihtawp an lo chhuah tawh thin a. Kum 1987 a AR leh civil inkara buaina thleng leh thihna hial a thlen hnu khan ngaimawhna hi a zual niin a lang.

Tarlan tawh angin sawrkar kal tawh ten theihtawp chhuah thin mahse vawiin thlengin an la awm a, AR te hian an hmun hi chhuahsan an hreh a, chhuah loh dan an dap ve reng nia a lan vangin vawiin ni thlengin an la awm niin a lang.

Hun kal tawh han thlir ila sawrkar laipui pawhin an chhuah tur thu hi vawi engemaw zat an sawi tawh a. Nikum March ni 29 pawh khan khatih laia Lok Sabha MP C.Lalrosanga chuan Union Home Minister a hmuhnaah Union Minister hian AR te an insawn tur thu hi a lo sawi tawh a.

Hei mai ni lovin April ni 1,2023 khan Home Minister Amit Shah ngei pawh Aizawl-ah lo kalin AR te Zokhawsanga an insawnna tur a hawng hial anih kha. Hetiang khawpa hmalakna a awm tawh chunga tun hnaia inremna ziah an ni leh te hi kawng lehlama ngaihtuah chuan a mak zawk a ni.

Mizoram sawrkar leh AR-te inremnaah hian tih tur an nei ve ve a, heng an tih tur zinga Mizoram sawrkar hmalakna tur hi thil hautak tak niin a lang a. Sawrkarin ram chinfel tur a neih te, tui intur hnianghnar pek te, kawng siamthat leh tih tur eng eng emaw a awm a ni.

Heng Mizoram sawrkarin a tih turte a tih fel phawt loh chuan AR hi an insawn duh a rinawm loh a, chhuanlam eng emaw siamin tuna inremna ziah pawh hi a tlawh leh mai ang tih hlauhawm tak a ni. Assam Rifles sawnchhuah hi thil awlsam lo tak mai a ni a, dawt sawi palh pawh awl tak a ni. ZPM sawrkar hian a sawnchhuak thei anih chuan a hmingthat phah hle ang.