Tunhnaia Mizoram State Legislative Assembly a hna hrang hrang lakna ah thil fello a awm nia hria in zirlai pawl pahnih Mizo Zirlai Pawl leh Mizo Students Union te chuan cancel leh an phut a. An cancel ta nge nge a ni. Tunhnaia Assembly Secretarariat a thawktu tur lakna ah Speaker leh official chhungte leh vua leh vang mi engemaw zat an tling hi zirlai pawl te duh loh leh an huat ber chu a ni a, hna lak hi a thara kalpui leh an duh a ni.

Mizoram State Legislative Assembly hi Mizoram sawrkar hnuai ni mahse a hranpa deuha thuneihna leh inrelbawlna hran nei a ni a, chuvangin sawrkar pawh hi a inrawlh thuk lemlo a. Tunhma deuh atang khan Assembly Secretariat a hnalakna ah hian official leh politician te'n an chhungte thun an ching nia sawi a ni a. Thuneitu lam ten an chhungkhat leh vua vang te thunna remchangah an hmang thin nia sawi a awm vangin thalai thenkhat phei chuan hnaruak hi dil enah pawh an en lo hial nia sawi te pawh a awm a. Tun tumah pawh mipui rinhlelh kai zawnga Assembly thuneitute vua leh vang hming a lang ta nual mai hi rinhlelh loh theih loh a ni.

Zirlai pawl ten hnalak tawh cancel leh tura an nawr kha an thlirna atang chuan an tih awm tak anih rualin an cancel takah chuan an lak thar te hi court lamah an kal ngeiin a rinawm a. Zirlai pawl te hian hmalak zel an tum bawk si avangin kan la buai chho hrih dawn niin a lang.

Assembly Secretariat a hnalak chungchang hi sawrkar hian a chhuichian ngei a pawimawh a, tuna an lak thar te hi tehfung chi hrang hrang atanga thiam leh tling an nih chuan lak ngei an ngai tihna a ni a. Chhungkhat induhsakna thil a awm anih chuan chu chuan nghawng tha lo tak a nei dawn a, thalai hna zawng mek te beidawnna khurah a hruailut dawn tihna a ni. Mizoramah hian lehkhathiam hna nei lo leh mi beidawng kan siam teuh ang tih pawh thil hlauhawm tak a ni. Tun dinhmunah chuan thawktu lak thar te hi la thawh tir hrih loh a, sawrkarin a dik leh dik loh a chhui phawt hi tih tur hmasa ber niin a lang.