Aizawl Bazarpui kan tih mai thin, tuna Aizawl City Centre tia a hming thlak an tum chu sak mumal lohin kum hnih dawn a awm ta a, he hmun hi Mizorama bazar lianber leh pui ber niin Aizawl mipui tam zawk ten pur kan chawkna thin a ni. Thiah a nih tawh hnuah sak lovin hun rei tak a awm tawh a, tunah hian hmalakna mumal la hmuh tur a la awm lo. Hunpui a lo hnai chho leh tawh a, hemi hma hian sak zawh hman chu a ni lo, chutihrual chuan he hmuna eizawngte tan leh mipui awlsamna tur hi ngaihtuah a hun ta khawp mai.

He building, Aizawl City Centre hi a sa tur contractor pawh thlan fel a ni tawh a, eng ang chiahin nge sawrkar hian hma a lak chhunzawm dawn tih chu la hriat lo mah se, a sak hna tan thuai hi tihmakmawh niin a lang a, chutihrualin hnathawk turte pawhin helai hmun, eizawn nana hmangte tana harsatna awm thei ang zawnga hmalak erawh a fuh ber lo thei.

Bazar thiah tak hmunah hian mi a za tel teh meuhin ei an zawng a, tunah pawh hian rem leh rem lo, silpauline inzar chawpin an inkulh a, ruah a sur emaw thli a thawt nat deuh chuan an insingsak thuai an mamawh thin a, chutianga nitin hun hmang chu an ni a, nitin pawh an eizawnna hmunah hian an inpho thei lo a, anmahni insiamremin kar khat danah an thut chhawk thin a ni.

Tuna an kalphungah hian a chawhmeh zuarte hi hranpain an thil zawrh te hi thutpui bawk mah se, chawhmeh hi tumahin ta bil an nei lo a, an chawhneh lakkhawm te chu association chun kut kenin chung an chawhmeh atanga an hlep te chu an insem mai thin a ni.

Hetiang dinhmuna hun rei tak ding tawh an nih avangin sawrkar pawh hian an dinhmun hi chiang takin ngaihtuah se, an thutna tur hmun hi a rang lama an buatsaih hi a tul tak zet tawh a, building sak a nih hunah pawh an zai ngaia hram an phu a, an tana hnawksak lo zawnga chet a tha ang.

Kawng lehlamah anni hi Aizawl mipuiten kan mamawh kan lamna ber an nih avangin hnawh bo ngawt theih an ni lo tih pawh hriat tel a tul a, a bul vela dawr tam tak pawh hi heng chawhmeh bazar behchhan an nihna pawh a awm bawk. He chawhmeh bazar hi Aizawla chawhmeh bazar hmasa a ni tih kan hriat theuh angin, dawr dangte hi chu he bazarpui kan neih hnua rawn inzar pharh ve chauh an ni tih kan hriat a ngai.