Assembly session neih mekah Health Minister Lalrinpuii chuan damlo te damdawia inenkawlna senso sawrkarin a tum theih chin Health Care Bill-a ba zawng zawng chu tun Financial Year tawp hma in pek chhuah vek tum a ni tih a sawi a. Health Minister Lalrinpuii chuan SEDP sum cheng vaibelchhe 150 atanga Health Care bill tur cheng vaibelchhe 40 dah hran chu sem chhuah a la ni lo a ti a, sawrkarna an chan hlimah Chief Minister in cheng vaibelchhe 15 a pe chhuak tih a sawi bawk. Health Minister thusawi hian damlo bill nghakhlel tak tak te a ti lawm ngei ang.

Mizoramah hian MNF term hmasa atang khan Mizoram State Health Care Scheme hi kalpui tan a niin damlo ten an chhawr tangkai hle a. Chutih rual erawh chuan a kalpui dan a fuh tawk lo deuh nge a tir atangin buaina neuh neuh a awm nghal a, harsatna hrang hrang karah sawrkar chuan kalpui zelin vawiin ni hi kan thleng ta a ni. Health care scheme hi damlo mi engemaw zatin an chhawr tangkai tawh a, a nihna ang taka kalpui anih chuan damloh ni khua pawhin hmuh let tur a awm theih dawn vangin damlote innghahna ber pakhat a ni.

Heti taka scheme tha ni si hi a kalpui dan a fel tawk loh vang nge ni kum tina inziaklut hi an tlem telh telh mai a, hei hi a chhan ber nia lang chu bill a tan rei vang a ni. Tunah pawh chhungkaw tam tak chu lungngaiin an kun mek a, damlo tam tak hi chhungkaw harsa ve tak tak an niin phai lama inenkawla tum engemaw zat kal ngai te an ni a. Damlo tam tak chu an kalna bill hmanga kal nawn leh thei chauh te an ni a, mahse an bill lak hun tura an ruahmanah an kal theih thin loh avangin harsatna an tawk thin a, hei vang hian inziahluh pawh hi tul an ti lemlo a ni thei ang.

Sawrkar laipui chuan mitin huapzo damdawi inenkawlna Pradhan Mantri Jan Arogya Yojana (PM-JAY) a kalpui a, he scheme tha tak hi Mizoram ah pawh hman ve a niin ration card pawl leh card eng nei te chuan an hmang tangkai thei a. Hetih lai hian PMJAY ah hian sawrkar package siam chu a hniam deuh vang nge ni sawrkar damdawi in leh private damdawi in thenkhatah chauh hman theih a ni a, private damdawi in tam zawk chuan an hmang ve duh lo a ni. Chutih lai chuan Mizoram State Health Care Scheme erawh damdawi in zawng zawngah hman theih/pawm anih avangin damlo te tan chuan a tangkai hle a, damlote harsatna lai ber bill ba pek theih a ni dawn ta hi damlote tan chuan thil lawmawm tawpkhawk a ni.