India hi inthlang ram kan ni a, dan tlangpuiin kum 5 danah kan aiawha roreltu tur kan thlang thin a ni. Kan aiawha roreltute chuan inthlan dawnin an tih tur leh tih loh turte an puang thin a, chuta tang chuan mipui ten kan duh ber kan thlang ta thin a ni.

Kan aiawha roreltu tura kan thlante hian ram leh mipui tana tha ber tura nia an hriat hmangin ram an kaihruai thin a. Tunah pawh Mizorama sawrkarna chelh mektu Zoram Peoples Movement chuan thla 9 vel thuneihna an chan chhungin hmalakna engemaw zat an nei tawh a, sawrkar hmalakna faktu engemaw zat an awm laiin sawiseltu pawh thahnem tak an awm bawk.

Sawrkar hmalakna zingah naktip October thla atanga ration card var neite ration khulna man tihto tur hian mipui-ah titi a siam nasa hle. Kan hriat angin tun hnai maiah sawrkar chuan khua/veng hrang hrangah ration card ennawn hna a kalpui a. Ration card ennawntu tur selection committee ruatin chung mite chuan dik leh felfai tak nia an hriat hmangin ration card enthat hna hi an thawk a ni.

Ration card ennawnah hian a hmaa card pawl (PHH) a lo awm thin card var a sawn takte, card var atanga card pawl a sawn pawh thahnem tak an awm a ni. National Food Security Act hnuaia hamthatna dawng thei tur AAY leh PHH thlan kawngah hian thil harsa tak mai a awm a. Vai ramah te chuan tunge rethei a, tunge hausa tih hi chiang takin a thliar nghal theih mai a, Mizoramah erawh chuan thil har tak a ni thung. Chuvangin tu emaw card var a dah khan a thenawmpa, amah ai pawha hausa nia a hriat leh in leh lo pawh nei tha zawka a hriat kha PHH card a neih chuan inthikna a awm ngei dawn a ni.

Mizoram hi thawhchhuah nei lo state kan ni a, chutih laiin kan nitin mamawh electric, tui leh buhfai man atana sawrkar senso hi a tam hle mai a. Sum peipunna atan sawrkarin card var neite tan buhfai khulna Rs. 15 atanga Rs. 30-ah a tipung hi thil awm tak a nihna chen a awm a, chutih rual erawh chuan tum khata 100% a tihsan a ni erawh a lutuk deuh ni chuan a lang.

Thla thar atanga card var neite tan buhfai lakna to tur chungchangah hian a taka hman anih hunah chuan mipui thahnem tak hi an phun ngei dawn tih a hriat a. Tun dinhmunah chuan NFSA hnuaia hamthatna dawng thei hi kum 2011 chhiarpui atanga teh anih tlat avangin mi 7,06,296 bak an awm thei si lo a. Chhiarpui nei atangin kum 13 emaw kan hmang leh tawh a, mihring punna pawh a sang hle ang tih a hriat a ni. Chuvangin sawrkar hian NFSA hamthatna dawng thei tur tihpun kawngah hma a lak a, sawrkar laipuiah pawh na taka a nawr a pawimawh hle.