Mizote hi hnamdang ngaihtuah chuan kan la tlem hle a, hei mai ni lovin society inpawh tak kan ni bawk. Bible in thenawm khawvengte hek lo turin min zirtir niin kan hre bawk a. Hei vang hian nge ni thubuai insiam sak emaw Court kal te hi kan hreh em em mai a. Dan leh thupek kengkawhtu lam pawhin thubuai siam ai chuan engtin emaw inrem taka chinfel dan hi an dappui zawk ni pawhin a lang.

Mahni thenawm khawvengte emaw kan hmelhriatte thubuai siamsak chu kan hreh tlang a. Hengte avang hi nge ni nitin kan hmuh thin leh sunday school kan kalpuite ai chuan min hre ve lemlo ten thubuai hi chhui se a tha zawk ang tih ngaihdan lian tak a awm a. Hei hian thilsual ti thinte a ti tawmim ang a, court pawhin chak zawkin hna a thawk thei dawn niin kan ngai a ni. Chutianga India rama hma la thin tu chu Central Bureau of Investigation (CBI) te hi an ni. CBI koh luh leh koh luh loh chungchangah ngaihdan inang chiah lo a awm a, koh luh duh an awm laiin koh luh kher ngai ti lo pawl an awm bawk.

Tuna Mizorama rorelna fawng chelh mektu Zoram Peoples Movement party hi Mizorama CBI koh luh duh party zinga mi an ni a. Inthlan dawn leh inthlan zawhah pawh koh luh ngei an tum thu an sawi a, Chief Minister Lalduhoma pawhin CBI te chu duh duha thil an chhui theihnan leh zalen taka an khawsak theih nan remtihna 'general consent' an pek thu pawh a sawi a ni. Sawrkar hmalakna hi mipui tam zawkin an thlawp niin a lang a, CBI ten Mizoramah hna an thawh chuan eirukna leh hlemhletna pawh a tawmim ngeiin an beisei a. Mahse tunhnaiah CBI general consent pek chungchangah thu inchuh a awm ta tlat mai a, hei hian mipuite a ti chiai hle.

Zoram Peoples Movement Legal Department chuan tunhnaia chanchinbumite an kawmnaah New Criminal Law hman anih vangin CBI koh luhna hi chhuah thar leh a ni a, sut a ni lo niin an sawi a. Parliament in criminal law pathum a pass tak avang CBI lamin Gazette Notification ti chhuak thar leh tura an ngenna vang nia sawiin Notification chhuah thar chu general consent sûtna, nuaibona leh withdraw-na a ni lo a, danin a phût angin Mizoram Sawrkar hian Notification hi a chhuah thar leh mai chauh zawk nia sawiin CBI hnena consent pêk an ngaihna huangchhungah Mizoram sawrkar chu a tlanchhe ngai dawn lo niin an sawi bawk.

Hetih lai hian MPCC Senior Vice President leh Chief Secretary hlui ni bawk Lalnunmawia Chuango chuan tunhnai khan chanchinbumite kawmin Nilaini kalta khan Chief Minister ah lehkha thehlutin CBI in Mizoram chhunga hna (investigation) an tih theih nan leh inthlan hmaa an intiam ang ngeia general consent pe let tura ngenna an thlen niin a sawi a. CBI Director lehkha chhuanlama hmangin sawrkarin thu a zuk leh niin a sawi a. ZPM leh Congress hruaitute thusawi chu a inkalh ta a ni.

Hetiang hi thil awmdan a nih tak avangin eng hi nge dik a, eng hi nge dik lo tih mipuiin an hre ta lo a ni. Sawrkar hian a tirah chuan CBI te hi general consent a pe ngei a, mahse tunhnaia sawrkar thuchhuah kha inhnialna siamtu a ni a. He thilah hian mipui tan ngaihdan siamthiam a har a, politician-te thusawi hian a tibuai leh zual bawk. Chuvangin CBI general consent pek chungchangah hian sawrkar hian a dinna dik tak puang thei se a duhawm hle.