Mizoram sawrkar chuan eirukna a reh theihnan leh hlemhletna chi hrang hrang a bo theih nan hetiang lama hma la thin tu Central Bureau of Investigation (CBI) ten Mizorama hna an thawh theihna atan thil chhui ngaite an chhui theihna chu Vigilance department hmangin ni 28.12.2023 khan Gazette ah a chhuah a. Hei hian mipui titi a siam tam nghal hle.

CBI koh luh/remtihna pek hi chi hnih general consent leh specific consent a awm a. General consent hi pek a nih chuan State sawrkarah phalna lak chawp zel ngai lovin thubuai an chhui thei a, specific consent ah chuan thubuai a zirin a chawp zelin state chhunga thubuai chhui phalna pek chawp an ni thin. Tun hma lamain sawrkar kal tawh ten general consent hi an la pe ngai lo niin a lang a, tun tuma general consent pek hi kan thatpui ang nge thatpui lo ang tih chu hunin a la hril turah ngai ang.

Eirukna hi kan duh lo theuhin a rinawm a, chutih rual erawh chuan kan duh loh dan erawh a inchen lo hle awm e. Thenkhat eirukna do te hi chu eiru thei lo dinhmuna din vang mai mai ni te pawhin a lang a. Chuvangin CBI koh luh chungchangah pawh eng angin nge min nghawng ang tih a la hriat loh a, thil thar anih dawn avangin fimkhur taka lo dawnsawn a ngai ngei ang.

Tuna India ram dinhmun han thlir hian sawrkarna changtu apiang te hian CBI, Enforcement Directorate leh a dang te hi hmanrua ah an hmang nasa hle niin a lang a, sawisel pawh a hlawh hle anih hi. CBI koh luh tur thu ah pawh hian ko lut ta ila eng chen chiah nge kan state hian thuneihna a neih dawn hriat mai a harsa a. Kan duh chin kan chhui tir dawn nge an duh duha zalen taka thil an kalpui kan remti dawn? Kohhran thlengin chhui ta se hnawk kan ti ang em? Duh thalin khawsa ta se min dim vak lo mai thei a, thil tha tak nia kan hriat hi kan duh lo leh viau thei.

Mizote hi hnamdang te nen chuan kan hrang hle mai a. Kristian kan nih vang hi nge ni a tira misual nia kan hriat, hrem tura kan duh te pawh hrem an nih meuh chuan khawngaih leh si te kan ni lawi a. CBI te hian duh thalin hna thawk ta se kan haw leh mai lovang tih pawh sawi harsa tak a ni. Engpawhnise CBI chu an lo lut ngei dawn niin a lang a, eirukna pawh a tawmin ngei turah ngai ila. Lo dawnsawn dan erawh kan thiam a ngai dawn hle niin a lang.