Mizoram hi kan hriat angin inthlang ram kan ni a, kum 5 danah kan aiawha roreltu tur Lok Sabha MP, State Legislative Assembly a roreltu tur MLA, kan khawpui Aizawl leh Lunglei a roreltu tur bakah tualchhunga roreltu tur Local Council leh Village Council te kan thlang thin a ni. Heng inthlanna chi hrang hrang kan neih zingah hian MLA inthlan hi kan ngai pawimawh ber a, a chhan chu state a roreltu an nih vang a ni. Kan state a roreltute chuan kan ram tana tha ber tur nia an hriat hmangin ro an rel thin a, an rorelna tha kan tih loh chuan a thlak theitu chu mipui tho kan ni.

Nikum kum tawpah kan rama roreltu tur kan thlang a, chutah chuan hneh takin Zoram Peoples Movement ten sawrkarna an siam a. Thla 8 emaw vel sawrkarna an kalpui chhungin ram tan thil tha tam tak an ti a, kawng tam takah mipui fak an hlawh a ni. Sawrkar chuan ram kaihhruai tum dan a nei thin a, tun sawrkar pawh hian sawrkar sum a pun lehzual theihnan chhiah lak lamah tan a la niin a lang.

Tunhnai deuh khan Revenue department-ah stamp tihsan a ni a. FCS&CA department chuan Ration card var neitute tan buhfai subsidy an pek thin kg khata Rs. 15 chu subsidy pe tawh lovin kg ah Rs.30 in an khul a ngai tawh dawn bawk a. Tunhnai maiah Taxation department chuan petrol leh diesel atanga chhiah lak thin chu a ti sang bawk a ni. Heng sawrkarin sum lakluhna atana a hman zingah hian stamp duty sang hi chu mi hausa leh neinungte pek anih avangin mipuiin kan tuar lutuk lo a. Buhfai man tih to pawh hi a taka la hman a nih loh avangin eng ang takin nge kan tawrh dawn leh mipui lam atangin sawiselna awm tur hriat a la ni chiah lo a. Petrol leh diesel man to erawh hi chuan mipui a nghawng ngei a rinawm.

Lirthei hi kan nei vek lo a ni thei e, mahse nitin khawsakna atan kan hman a tul a, chuvang chuan bus, taxi leh maxi cab chuan mante hi hun reilote ah chuan a pun ngei a rinawm a, a tuartu tur chu mirethei bawk kan ni. Hetia mipui lama chhiah tihsan anih lai leh year of consolidation puan anih lai hian tul lemloa mipui ten an hriat leh sum engemaw zat hmanna tur sawrkar hian a siam nia hriain eptu lam leh mi tam tak chuan an hrethiam lo hle. Tun hnaia petrol leh diesel a chhiah tihsan hi mipui ten an hriatthiam zawk theih nan kawng siamthatna leh vantlang tana tangkaiah hman a ni dawn niin Taxation Minister chuan a sawi a, thil tangkaiah hian an hmang ngei em tih leh kan kawng hian a that phah em tih mipui ten an thlir ngei dawn tih sawrkar hian hriain tanlak lehzual nan hmang ngei teh se.