Kumin kum tawp lamah Mizoram chuan kan ram roreltu tur MLA kan thlang dawn a, tun atangin party tin te an tangin sawrkarna chan ngei tumin theihtawp an chhuah a. Party hrang hrang te pawhin an khingpui te an bei na sawt ta khawp mai a, hetih karah hian chintawk erawh hriat thiam a pawimawh hle.

Mizote hian kan pi leh pu nundan mawi vawiin thlengin kan la chhawmnung chho zel a. Khawtlang, kohhran leh politics ah pawh he nundan mawi hi hmuh tur a la awm reng a ni. Amaherawhchu tunhnai engemaw atang khan hnamdang chindan tha lo thenkhat chu lalut in kan hmang chho tan niin a lang a, a pawi hle.

Inthlan kan hnaih chho tial tial ang a, political party hrang hrang te pawh an tang chho deuh deuh ang. Chutih hunah chuan dawt leh thu diklo hmanga inbeihna te, tharum thawhna leh bomb puak tih ang chi te hi a awm chho mai ang tih hlauhawm tak a ni. Mizote hi kan vela hnamdang te ai chuan sualna chi hrang hrang lakah hian kan la felfai zawk a, mi diklohna leh tlin lohna lam sawi tam lutuk te hi ching lo ila. Inthlan loawm turah pawh hian tun atanga kan fimkhur a, chintawk kan hriat a pawimawh hle.

Mizote hi hnamdang ngaihtuah chuan kan la tlem hle mai a, chuvangin a mimal ang zawnga inbeih vak vak mai te pawh hi kan tih loh a tha hle mai. Tumah hi famkim kan awm lo a, tute emaw mimal leh chhungkaw nun inphawrh vak vak te, a tha lo zawnga an chanchin sawi vak vak te hian mipui vote huikhawm aiin anmahni khawngaih zawngin a kal thei zawk tih pawh hriat a tha hle.

Chuvangin tun atang hian political party hrang hrang te pawh hian mimal inbeihna leh in lepse lam aiin party policy leh thiltum lam sawi uar ta zawk ila. Mimal nun inphawrh vak vak leh insawisel kawngah kan fimkhur a, chintawk kan neih thiam a pawimawh hle.