Tunhnaia Chief Minister Lalduhoma hova Council of Ministers thukhawm chuan mipui nghawng thei tur thutlukna chi hnih a siam a. Lunglei khawpuia meeting chuan tuialhthei atanga VAT (value added tax) lak tihpun leh AMC leh LMC a Corporator leh Councillor te hlawh tihpun an remti a.

Council of Ministers thu­tlukna hian mipui a nghawng dawn avangin sawizui pawh a hlawh hle a. POL atanga chhhiah lak tihsan hian nasa takin mipui a nghawng thei dawn a, petrol leh diesel man a to miau chuan lirthei chuan man hi a to ngeiin a rinawm a. Hei mai bakah lirthei neitute pawhin bungraw phurh man leh hire man an tihto phah ngei a rinawm bawk.

Corporator leh Councillor hlawh/lawmman tihsan chungchangah pawh Council of Ministers hi an thilphal hle niin a lang a. Aizawl Municipal-a Corporator te hian Rs. 23,500 an hlawh thin a, hlawh tihsan rawtna Council of Ministers in an pawm tak chu Mayor hlawh atan Rs. 78,000, Deputy Mayor hlawh atan Rs. 72,000 Executive Corporator hlawh atan Rs. 55,000 leh Corporator hlawh atan Rs. 50,000 a ni a. Lunglei Municipal Council Chairman hlawh atan Rs. 74,400 an pawm a, Vice Chairman hlawh atan Rs. 68,400, Executive Councillor Rs. 52,000 leh Councillor hlawh atana Rs. 47,000 a ni. AMC ah hian ward 19 a awm a, LMC ah ward 11 a awm bawk a, kum khata kan aiawhte lawmman senso tur hi a tam hle a ni.

Hei mai bakah tunhnai mai khan Food, Civil Supplies & Consumer Affairs Minister B.Lalchhanzova chuan chanchinbumite a kawmnaah Mizoram sawrkarin ration card var neitute tan buhfai kg khat Rs. 15 a leitir thin chu Rs. 30 ah a tisang a, he hmalakna avang hian sawrkar chuan thla tin Rs. 5,25,93,072 a hum thei dawn nia sawiin he thutlukna hi ni 18.6.2024 a Cabinet meeting thutlukna a nih thu a sawi a. Sawrkar laipuiin National Food Security Act (NFSA) a kalpui mekah hian mirethei tak tak, mahse card var neite an awm a, chutih laiin mi hausa, in leh lo tha tak tak nei zing­ah card pawl (PHH) neite an awm leh lawi a. Heti anih vang hian mirethei tam takin buhfai hi a man toa an lei a ngaih dawn avangin sawi­zui pawh a hlawh deuh niin a lang.

Mipui ten ZPM sawrkar an piantir chhan hi sawrkar danglam a pian an beisei vang a ni a. Chief Minister in sawrkar lakluh anih zawha chanchinbumite a kawmnaah pawh kum khat chhung chu insawhnghehna atan hman an tum thu a sawi a. Mahse Chief Minister in Minister of State rank Adviser a ngah lutuk te, Secretary rank leh OSD awmte hi tul lova sum senna niin mipui ten an hria a. Sum ren tura an insawi laia sum an ren lo leh mipui lam atanga sum tuak niawm taka sawrkarin thil an ti leh ta hi mipui hian pawm har an ti ni berin a lang.