Khawvela infiammite intawhkhawmna lian leh ngaihhlut hlawh ber Olympic games thleng turin India chu a inbuatsaih mek a. Ruahman dan chuan kum 2036 Olympic games hi India ah nghah ngei a tum a, ruahman dan chuan Gujarat khawpui Ahmedabad ah infiamna ropui hi thlentir tum a niin tun atangin sawrkar laipui chuan hma a la chho mek tawh a ni.

India in Olympic a thlen tum inbuatsaihna atan June ni 13-14, 2024 khan Baptist Centre, Falkland, Aizawl-ah Mizoram Sports Conclave neih a ni a ni a. Conclave hi Olympics 2036 a Mizo infiammi tam thei ang berin Olympic medal an awrh theihna tura inbuatsaihna hmasa a ni a, conclave neihna atan hian Scheme of Human Resources Development in Sports (HRDS) chuan Rs. 68,80,500/- an pe a ni. Conclave hawngtu Chief Minister Lalduhoma chuan Vision 2036 Olympic chu sawrkar policy ni turin ruahmanna kalpui mek a ni tih sawiin Sports Conclave chu Mizoram leh India-in infiamna lama a duhthusam a thlen dik theih nana rahbi pawimawh hmasa, zinkawng bul intanna niin a sawi a. Olympic 2036 a lo thlen hunah Mizo infiammi tam zawk an inlan theihna tur leh khawvel infiam­mi ropui leh a tha ber berte nena inelna hmachhawn thei tura inchher chhuahna tura hmalakna hmasa tih a sawi bawk a ni.

Hetiang sport lam hmathlir sawihona leh inrawnkhawmna hi India ram state zingah Mizoram chu a nei hmasa pawl niin a lang a, sawrkar hotu ten hetiang hun buatsaihna chang an hria in an fakawm hle. Sawrkar hmasa, Congress kaihhruai sawrkar khan Olympic 2016, Brazil khawpui Rio de Janeiro a neihah khan Mizo infiammi thahnem tak an tel theihna atan hma a la a. Catch them young policy kalpuiin Sports discipline 11 ah insawrbing in theihtawp a chhuah a. Mahse hmalakna hi a tlai deuh nge ni awmzia a awm thui lo a, a pawi hle.

Kan hriat angin Mizo mipui heti zozai zingah Olympic a inlan pha kan la tlemin mi 2/1 chauh an la tel thei a. Asian games a ni emaw national games leh hmarchhak bial infiamna thlengin Mizo ten medal kan la hawn tlem hle a, hei hian tanlak a tul zia a tilang chiang hle. Olympic 2036 inbuatsaihna atan hian kum 12 kan la nei tihna a ni a, chuti anih chuan tuna kum 10 pawh la tling lote hi tih tak zeta an kalna kawng tura kan hruai chuan beisei a sang hle ang.

Sawrkar kal tawhah khan discipline 11 ah insawrbing a ni a, hetiang deuh hian Mizote lan ve theihna tur discipline ah kan insawrbing loh chuan awmzia a awm lo mai ang tih a hlauhawm hle. Infiamna thenkhat, Mizo ten kan tuipui em em te hi chu engtikawng pawhin kan qualify hmel loh niin a lang a, chuvangin Olympic a Mizote tel ve ngai theihna tur conclave hian hmuchhuak thei se a duhawm hle.