October ni 5,2023 atangin Transport Department Enforcement staff leh Aizawl Traffic Police te chuan lirthei endik hna an kalpui a. He endikna hi thla 6 chhung, March ni 22,2024 thleng kalpui an tum a ni. He endik runpui neih chhung hian hmun remchang apiang ah lirthei document chi hrang hrang insurance, road tax, pollution certificate leh thil dang te a fel em tih an endik thin dawn a. Hetianga document fel lo te chu a tul angin pawisa pawh an chawitir zel dawn a ni.

Transport department an ni emaw Traffic Police lam pawh nise hetiang endik runpui hi hun kal tawhah pawh neih thin a ni tawh a. Chung hunah te chuan lirthei engemaw zat hetianga document fel lo te hi man a lo ni tawh thin a ni. Chuti chung chuan kum tin mai mi engemaw zat man tur an awm reng mai hi chu a zia lo a, lirthei neitu leh khalhtute inenfiah a ngaihzia tarlanna chiang tak a ni.

Lirthei neitu leh khalhtu ten dan kan zawm hi tu tan mah ni lovin keimahni tan zawk zel a ni a. Entirnan insurance thi te anih chuan kha lirthei khan accident te lo tawk palhin thihna hial te lo thleng ta se a tuartu tur chu a lirthei neitu kha a ni a. License nei lovin lirthei an khalh te hian chetsualna lo thleng palh ta se a pawi thui thei hle a, chutiang zelin two wheeler a helmet vuah te pawh hi tu tan mah ni lovin a khalhtu himna atan a ni zawk a ni.

Kum tin maiin hetianga dan leh thupek kengkawhtu ten lirthei endik runpui an neih lai hian lirthei veivak hi an tlem ziah a ni. Kumin ngeiah pawh lirthei endik runpui an neih atangin Aizawl khawpui Traffic chu a hma ai chuan a thawl hle a, hei hian a entir chu document fello vanga tlanchhuak ngam lo an tam hle tihna a ni.

Document mai bakah pollution test pawh lirthei neitu ten kan ngai pawimawh lo hle tih a lang a. Nikum lamah pawh dan kengkawhtu ten pollution certificate an phut lai chuan test tura intlar an tam lutuk a, mipui kan phun sup sup a. Kuminah pawh hetiang test tur hian zing atanga intlar te a ngai a. A test tu lam tan pawh a luhaithlak a, hun dangah nise test tur a awm mang lo thung. Tuna dan kengkawhtu ten lirthei endik hna an kalpui hi a document fello te tihfel nan hmang chho zel ang u. Dan zawm hi kan himna leh khua leh tui tha te tih tur a ni tih hre thar leh ang u.