Thawhlehni kalta khan Directorate of Economics & Statistics buatsaih 'Mizoram Statistical Abstract 2021' leh 'Annual report on Registration of Birth & Deaths, Mizoram, 2021' chu tlangzarh a ni a. Hetiang lehkhabu tha tak mai department in an ti chhuak thin hi a lawmawm hle.

Economics & Statistics department hian kumtinin data chi hrang hrang hi an ti chhuak thin a, mahse heng data te hi a tangkai tur angin kan hmang tangkai tawk lo hle niin a lang. Tun dinhmunah chuan Economics & Statistics department in data an siam aia tha leh rintlak hi chu kan la nei lo a ni.

Heng data hrang hrang atang hian kan ram dinhmun dik tak a hriat theih thin a. Entirnan nikum lama naupiang leh thi zat atang te hian eng kawngah nge tan kan lak a ngaih. Khawi district ah nge thi tam ber a, eng natna vanga thi nge an nih tih te zirchiang ila. Chung zirchianna atang chuan sawrkar pawhin tanlak dan tur a thiam thei dawn a ni. Chutiang zelin Mizoramah hian kumtin naupiang zingah mipa an tam zel a, chutih rual chuan puitling vote nei thei ah hian hmeichhia an tam zawk thung si a, hei hi enge a chhan tih te chhuichian a tha hle a. Mithiamte tan research beihna tham a ni a, India ram hmun dangah mipa voters an tam laia Mizorama hmeichhe voters an tam tlat mai te hian mi mak tih a hlawh hle a ni.

Mizoram sawrkarin central a thil kan dil dawn pawhin data rintlak kan neih loh fo thin avangin harsatna te kan tawk thin a. Mahse hetia data rintlak kan neih chuan heng kan data hrang hrang te hi sawrkar laipuia thil dil leh nawr nan department hrang hrang te hian hmang tangkai zel se a duhawm hle. Central lama thil kan dil dawn pawhin data mumal leh rintlak kan neih chuan dil leh pek pawh a awlsam sawtin a rinawm bawk.

Chumai bakah nakum maiah Mizoram chuan kan ram hruaitu tur kan thlang dawn a. Heng hunah te hian political party hrang hrang te hian hmang tangkai ngei se a duhawm hle. Mizoram mamawh leh chaklohna lai eng nge ni a, engtia hmalak tur nge tih te a hriat vek dawn a. Policy leh manifesto a hmang thiam tan chuan thatpuina tham a tling a ni. Sawrkar kal tawh leh sawrkar kan hrawn mek ten an ngaih pawimawh ber thin kuthnathawktute tan eng nge pawimawh hmasa ber, engtia puih nge ngai tih leh thil dang dangah te hmalak leh hmachhawp neih dan tur te a hriat dawn a ni. Economics & Statistics department ten rim taka an thawh hnua Data rintlak tak mai an siamchhuak hi a lawmawm a, tangkai taka hman zel nise a duhawm hle.