DOWNLOAD OUR APP

Read latest news on your phone
app-store

Editorial : Eng chhit man chungchang

Feb 20, 2022

Department lam pawh hi an inenfiah a ngai hle a, power hloh (loss) tam lutuk leh thildang mipui khamkhawp lohna lai te hi an enfiah a tul hle mai. Mipui te hian kan duhkhawp eng chhit theih hi nei ila a man pek hi kan hreh hauhin a rinawm loh. Eng chhit man bithliahtu JERC hian a tipung dawn anih pawhin mipui tana zangkhai thei ang ber ngaihtuah chunga ngaihtuahna a sen a pawi-mawh hle.

Mizoram leh state hrang hrangah eng chhit man bithlaih a ni thin a. Department lamin rawtna an neih te chu Electricity Regulatory Commission ten an lo enfiah hnuah mipui phurrit lo thei ang ber nia an hriat angin an lo bithliah thin a ni. Mizoram pawhin hetianga eng chhit man bithliahtu hi kan nei a, Manipur state nen kan intawm avangin Joint Electricity Regulatory Commission for Mizoram & Manipur chu kan eng chhit/hman man bithliahtu ber a ni.

Kumtin thil man san ang zelin Mizoramah pawh Power & Electricity Department chuan eng chhit man ah rawtna a siam thin a, chu an rawtna chu Joint Electricity Regulatory Commission ah an thehlut a. Joint Electricity Regulatory Commission chuan mipui hnenah sawiselna emaw rawtna an neih te thlen turin hriattirna a tichhuak thin a, chung rawtna hrang hrang atang chuan mipui tana phurrit lo thei ang ber turin eng chhit man hi a bithliah thin a ni.

Kum dangah chuan eng chhit man chungchanga Joint Electricity Regulatory Commission in mipui hnena rawtna thehlut tura a hriattirah sawiselna leh rawtna a lut tlem thin hle a. Kuminah erawh chuan rawtna lut a awm ta nual mai a, hei hian kan chanvo chungchangah mipui te kan thangharh tih a entir awm e. Eng chhit man ang bawk hian thildang danga kan chanvo chungchang pawh mipui te hian kan ngaihven a, kan thanharh thar a pawimawh hle.

Kumin bika eng chhit man tisang lo tura ngenna a lut nual hian ngaihtuah a ti thui a. A changtu Power & Electricity department hnathawh ah mipui te kan lungawi tawk lo tih te pawh a entir thei awm e. Hei leh chen state kan ni chungin power kan indaih lo reng mai a, sum tam tak senga kan siam kan hydel project ten hna an thawk tha thei lo a. Chumai bakah department inenkawlna kawngah thil diklo a awm nia an hriat avang leh mipui ten power supply kan dawng tha tawk lo te hian a sang zawnga eng hman man tihpun hi mipui ten an duh loh chhan niin a lang.

Engpawhnise eng chhit man hi chu kumtin enawn a ngai a, thilman sang chho zelah tihpun a tul ve bawk. Chuti ni lova a ngai emaw a hniam zawnga a kal chuan sawrkarin sum tam tak a hloh dawn avangin ennawn zel hi a ngai a ni. Chutih rualin department lam pawh hi an inenfiah a ngai hle a, power hloh (loss) tam lutuk leh thildang mipui khamkhawp lohna lai te hi an enfiah a tul hle mai. Mipui te hian kan duhkhawp eng chhit theih hi nei ila a man pek hi kan hreh hauhin a rinawm loh. Eng chhit man bithliahtu JERC hian a tipung dawn anih pawhin mipui tana zangkhai thei ang ber ngaihtuah chunga ngaihtuahna a sen a pawi-mawh hle.

Share now