Home Minister K.Sapdanga chuan 51st MJA general conference, Champhai a neih a hmanpuinaah chanchinbumite chu sawrkar sawiselna lam uar tur leh an sawisel thinnaah lawmawm a tih thu a sawi a. Hetianga mi in hawng an awm hi chanchinbumite tan chuan thil lawmawm leh chhinchhiah tlak tak a ni ngei ang.

Kan hriat angin India ram hi mipui rorelna sawrkar 'democracy' a ni a. Kan aiawha roreltu tur kan thlang thin a, kan duh loh chuan kan thlak leh mai thin a ni. Chutiang bawkin chanchinbu chuan sawrkar khalh ngil a ngaihna leh sawisel an ngaihnaah chuan an sawiselin an khak thin a. Hei tak hi democracy nawmna a niin mi fing chuan insiam that nan an hmang thin. Dictator rorelna a ni emaw sipai rorelna leh tu emaw lal hrawtna hmunah chuan tih ngam a ni thin lo a. Ram thenkhatah chuan sawrkar in media hi a thunun tlat a, an thuchhuah turte pawh endik sak hmasak vek thin a ni a. Ram thenkhatah chuan sawrkar sawiseltute chu manin jail ah hial tan tir an ni bawk.

Mizoramah pawh sawrkar hrang hrang a lo ding tawh thin a, sawrkar a zirin media an zalen in an zalen loh deuh chang pawh a awm tawh thin a. Hun engemaw lai kha chuan chanchinbumi ten man an tawkin jail ah hial khung an lo ni tawh thin a ni. Mahse tun hnai hun engemaw chan atang khan media chu a zalen in ram hruaitute khalh ngil kawngah pawh theihtawp an chhuah a, sawrkar sawisel a ngaihna laiah pawh inthlahrung lo takin an ngaihdan an ziak thin. Chumai ni lovin thuziak mi te pawhin sawrkar dik lohna lai sawisel pawh a tam hle bawk.

Chutih rualin chanchinbumite leh thuziak mite hian sawrkar hi an sawisel ngawr ngawr bik lova, thiltih that an neihna angah chuan an fak bawk thin. Home Minister hian in hawng takin thu a sawi tih a hriat a, hetiang rilru zau tak hi Minister dang te pawh hian pu vek thei se a duhawm hle. 

Sawisel ngam loh sawrkar kan nei anih chuan a tuartu tur chu mipui leh ram a ni dawn a. Sawrkar khalh ngiltu zinga mi chanchinbumite tana in hawng Minister an awm hi a lawmawm a, hei hian nasa leh zualin ram siamthat leh enkawl kawngah chanchinbumite a fuih ngei a rinawm.