Kum tina hman thin faina hapta chu kumin atan chuan khar a lo ni leh ta a. Faina hapta chhungin veng/khaw hrang hrangin theihtawpin hma kan la a, hei vang hian kan in leh a vel mai bakah kan khawlaite chu ni dang zawng aiin a faiin hmuh a nuam a. He faina hapta hi khar ni tawh mah se mi tinten fai kan nunpui chhoh zel hi a pawimawh hle.

Kum 2 chhung hripui vangin faina hapta pawh kan hmang tha thei lova, kuminah erawh chuan hriin min kiansak deuh tak avang leh nunphung pawh a pangngai chhoh leh tak avangin faina hnatlangte neiin hun kan hmang leh thei ta a, thil lawmawm tak a ni.

Aizawl hi India ram khawpui zingah chuan fai kawnga hmasawn ber pawl niin a lang a, a mi chengten tan kan lak phawt chuan khawpui fai ber zinga mi a ni thei a ni. Tun dinhmuna kan mamawh ber chu chhung tinten bawlhhlawh thliar hran (segregation at source) hi niin a lang a. Kan bawlhhlawhte thliar thain a paihna hun leh hmun dik takah paih chat chat ila chuan fai kawngah pawh hma kan sawn ngei ang.

Aizawl khawpui enkawltu AMC pawhin awlsam zawka mipuiten bawlhhlawh an paihna tur hmun hi a ngaihtuah a tul tak zet a. Tuna kan bawlhhlawh paihna hmun Tuirial hi chuan min zo tawh lo a, a paihna tur hmun thar hi ruahman rang thei se a duhawm hle.

Tun dinhmuna Aizawl khawpui titawptu langsar tak chu kan ranvulhte hi an ni. Veng tam tak chuan vawk vulh an phal tawh lo a, AMC pawhin khawpui chhunga vawk vulh khap tumin hma a la mek bawk. Hetih lai hian chhungkaw tam tak chuan ui leh ar kan vulh a, kan ranvulhte kan khuahkhirh that tawk loh avangin hmun hrang hrangah zun leh ek an thiar a. Hei hian khawpui a tihtawp mai bakah mi dang tan harsatna a siam thin tih hriain hemi kawngah pawh hian tanlak thar a pawimawh hle.

Fai pawimawhna hi kan hriat thar leh a tul tak zet a. Dam rei tur chuan hrisel a ngai a, hrisel tur chuan fai a pawimawh thung. Kan khawpui ber bazar tawp lutuk te hi thuneitu lamin an enfiah a tul tak zet a, hnamdang khualzinte hmuh atan pawh a zahthlak a, cheithat a mamawh hle.

Nu leh pate hian fai nunpui kawngah kan tu leh fate kan zirtir thar leh hi kan mawhphurhna a ni tih kan hriat thar leh a pawimawh a. Fai vangin tunhma lama natna chi hrang hrang kan vei thinte pawh kan pumpelh thei a ni. Fai hi thil har a ni lo a, mi tin tih theih a ni tih hriain faina hapta hi khar ni mah se chhung tinte kumtluana fai turin tan la thar zel teh ang u.