Mizote hi kan pi leh pu ah chuan hnam tawp leh bal tak kan ni thin a. Tunhnai hun engemaw chen atang khan faina kawngah hma kan sawn nasa hle a, khaw tam tak phei chuan fai hi an nunpui hial tawh a ni. Mizoram khaw hrang hrangah hian khawpui lam aiin thingtlang lam hi an fai zawk ta hial mai a, hmasawnna ropui tak a ni.

Tunhnai kum 2/3 kalta atang khan Aizawl khawpui leh khawpui lian dangah te faina kawngah hmasawnna nasa tak hmuh tur a awm a. A bik takin kan tui tlan ber te chu a thianghlim tawk lo a, khawpui thli bawlhhlawh in nasa takin a tibal a ni tih hriain a thenfai kawngah nasa taka hmalak chhoh a ni. Kan tui tlan hnar te dim na chang hre lova bawlhhlawh paihna atan kan hmang hi a pawi tak zet a ni. Tunlai hian kan tuitlan ti bawlhhlawh tu, lui leh kawr a bawlhhlawh thenfai kan intih hmuh nasa hle a, Aizawl leh khawpui dang dangah te thalaite hmalakna in thenfai hna thawh mek a ni hi thil lawmawm tak a ni.

Aizawlah chuan Save the Riparians hmalakna in March ni 26, 2024 atang khan Aizawl tui tlan Tlawng lui fintu luikawr tihfai Project hi tan a ni a. Ni 20 chhunga zawh tum ni mahse, a hautak em avangin zo hman lovin meter 2,000 chuang hret tihfai hman a ni a, May ni 1,2024 atang khan a thawhhnihna chu bultan chhoh leh mek a ni. Save the Riparians chauh ni lovin hmun hrang hrangah pawh tuilak chawmtu, lui leh kawr dungte thenfai hnatlang pui neih a ni a. April ni 27 khan Project Save Tlawng, Lunglei te huaihawtin Lunglei khawpui chawmtu pakhat Pialthleng lui hnar leh a lui dung thenfai hnatlang neih a ni a.

Champhai ah April 24-26 chhung khan Nature Learning Centre (NLC) in luidung thenfai leh humhalh hnatlang neih a ni a, Champhai khawpui chawmtu tui lakna, Tuipui lui leh a fintu Keilungliah luite then fai a ni. April ni 26 khan Govt. Model High School zirtirtute leh zirlaite chuan Khawzawl tui tlan, Tuichang hnar, Tuisen lui an tifai a. A hmain Eco Club ten lui dung thenfai hnatlang an lo nei tawh bawk. April ni 24 khan Govt. CZ HSS Eco Club te chuan Kolasib Tui lakna Tuichhuahen fintu, Tuilut lui hnar an thianfai a. Hei mai bakah khaw hrang hrang ten an tui tlan hnar te an thianfai chho mek bawk.

Kan bawlhhlawh tam ber hi plastic kaihhnawih a ni a. Sawrkar leh AMC in plastic a khap chunga heti tak maia plastic kaihhnawih a la tam hi thil pawi tak a ni a, sawrkar hian a khapna dan a chhuah kha khauh lehzuala a lekkawh a hun hle mai. Faina kawnga thalaite an pen chhuak hi thil lawmawm tak mai a ni a, thalai mi chak zawk ten faina kawngah hma an lak phawt chuan rah tha duhawm tak a chhuah ngei ang.