Sawrkar laipui chuan India ram balhzia hriain faina kawngah hma kan sawn a tulzia a hria a, hei vang hian nasa taka tan la tharin India ram khawpui leh thingtlangah faina nasa takin a kalpui a. Swachh Bharat tih hming vuahin nasa takin tan lak a ni a, tunah phei chuan Swachh Bharat 2.0 tih a ni ta hial. Swachh Bharat hnuaiah hian thingtlang leh khawpui ah te kalpui a ni a, Mizoram bikah chuan thingtlang lama faina buaipuitu Swachh Bharat Mission (Rural) atan PHE department chu nodal department an ni a. UD&PA department chu khawpui (urban) atan nodal department an ni bawk.

Tun hnai khan UD&PA hnuaia khawpui fai endikna result chu puan a ni ta a. Biate chu urban town ah pakhatna a ni leh a, hetih rual hian khawpui hrang hrang te chuan nasa takin hma an sawn a ni. Mizote hi hnam bal leh tawp a sawi kan ni thin a, mahse tunhnaiah erawh nasa takin hma kan sawn a. Tawng khat hmang kan nihna leh sakhaw khat bia kan nihna hian hmasawnna hnathawh kawngah awlsamna min siam a, faina kawngah pawh tanrualna min siam bawk.

India ram state tam tak ngaihtuahin Mizote hi kan fai sawt hle a, chutih rual erawh chuan hmasawnna tur erawh kan la ngah hle. Aizawl khawpui ngeiah pawh veng tinah bawlhhlawh paih motor kaltir a ni chungin luikawr leh hmun remchang laia bawlhhlawh lo paih ta mai kan la tam hle a. Tun hnaia ruah bawhawk surin bawlhhlawh a len chhuah tamziate ngaihtuah khan hmasawnna tur kan la ngahzia a tilang awm e.

Bawlhhlawh hi amah mai a lo awm ni lovin kan siam a ni a. Bawlhhlawh titlem tura tan kan lak a, plastic lam chi reng reng kan hman tlem a pawimawh hle. India rama state fai ber kan nih theihnan faina hi chhung tinin kan inzirtir thar leh a tha hle mai.