Tunhnaiah Mizoram Larsap chuan Chief Minister leh Sport Minister hnenah lehkha thawnin ritchawi chak pakhat chu Deputy Superintendent of Police (DSP) hna pe turin a ngenpui a. Larsap hian Mizoram Weightlifting Association te ngenna anga hetia sawrkar hnaa thun tura Chief Minister hi ngen niin a lang. Infiam mite hi an ropui a, kan chawimawi leh duhsak thiam zel hi an pawimawh rualin sawrkar hnaa inthun bikah hi chuan fimkhur taka ngaihtuahna hman hmasak nise a tha hle.

Mizoram hi state te kan ni a, mipui cheng pawh state dang te ngaihtuah chuan kan tlem hle a ni. Tunhma deuh te kha chuan infiamna lama mi chungchuang deuh te kha in hmun te pein sawrkar hna ah thun zung zung thin an ni a, mahse sport lam erawhin a tawrh phah zawk niin a lang.

Hman deuh khan Mizo boxer chhuanawm tak mai pakhat chu Sport department ah hna pek a niin in hmun pawh pek a ni a, mahse a hnu zelah boxing lamah hmuh zui tur a awm zui ta lo niin a lang. chutiang bawkin boxer pakhat chu Police department ah hna pek a ni bawk a, a lawmawm rualin hei hian nghawng thui tak a nei zui ta a ni. Boxer pakhat hna pek anih avang hian promotion a khawih buai a, mi tam tak promotion nghakhlel taka lo thlir reng tu leh beiseitu te tan khan a na hle a, thuchhuah pawh an siam hial anih kha.

Tuna sport association pakhat in DSP atana thun tura sawrkar an ngen pawh hi an thlirna atang chuan a awm viau a ni thei e. Mahse sawrkar hna an chelh chiah hian sport lam an ngaihsak ta lo deuh thin niin a lang a, inphumna chi khat te pawh a tih theih hial awm e. State hausa leh changkang zawk ten an lo ti a nih pawhin a pawng a taka tih ve zel tur a ni em tih te, sipai lamah te promotion emaw benefit (incentives) awm thei ang te ngaihtuahpui zawk te hi a finthlak awm e.

Chumai bakah hun kal zel tur ngaihtuahin Mizo zingah infiamna kawnga chungnung te lo awm chho zel ta se hetiang hna hi kan inpe chhunzawm zel thei ang em tih te ngun taka ngaihtuah a ngai a, kan la tuar thei a ni tih hria in fimkhur taka ngaihtuahna sen nise a tha hle.