Mizote hi khawvel ram hrang hrangah hnathawkin kan chhuak nasa ta hle mai a. Khawvel ram tin hi kan dap ve ta hial mai. A bikin Mizo hmeichhiate hi mipa te aiin an huaisen zawk emaw tih turin ram hrang hrangah an awm darh nasa hle a. Hetih lai hian tunhnaiah Arab rama awm te chuan harsatna an tawk nia sawi a awm avangin hma la turin Police te hial pun a ngai a, thil pawi tak a ni.

Khawvela hnam hrang hrang te hian hnam ziarang leh kalphung kan nei vek a. Mizote leh India rama hnamdang awm te pawh kan culture leh tihdan phung a dang hle. Mizote hi society inpawh tak mai, mipa leh hmeichhia thliarhrang lo kan ni a. Puitlingah phei chuan mipa aia hmeichhia kan tam zawk avangin hnamdang te mak tih a tling a. Chumai ni lovin naupiang turah pawh hmeichhia duhlohna leh hnualsuatna a awm lo a ni. 

Hetiang inenhranna awm lo hnam kan nih avang te, kan inpawh em em avang te hian hnamdang mak tih pawh kan hlawh a. India ram state danga kan awm pawhin mipa leh hmeichhiate kan inpawt nawk nawk a, kan inchhaih nui uar uar bawk a. Heng hi hnamdang culture nen inang lo lutuk te anih vangin mak an ti a, thenkhat phei chuan kan nula te hi zuamawm zawngin an hmu lek lek fo thin a ni.

Tunhnaia Mizo hmeichhia ten harsatna an tawhna hmun Arab ram hi Mosolman ram a ni a, heng ram te hi hmeichhe dah hnuaihnunna leh hmuhsitna ram a ni a. A kal fawr zual phei chuan hmeichhe lehkha zir te an phal lo a, khawlaia an chhuah pawhin an hmel tihlan te an khap hial a ni. Chuvangin heng Arab rama hnathawk tur tan chuan fimkhur a ngai hle tih hriatnawn fo a pawimawh hle.

Tuna harsatna tawk te hi engmah visa mumal pawh nei lem lo, work permit pawh nei mumal lo leh Agency phuahchawp deuh tak kaltlanga Arab ramah hian lut nia sawi a awm a, tak tak anih chuan a pawi tak zet a ni. Sawrkar hriatpui loh leh Agency rintlak tak kaltlang lo a kal an nih phei chuan buaipui an harsa lehzual dawn tih a hriat a, an khawngaihthlak tak zet a ni. Tuna harsatna tawk mek te hi sawrkar hian theihtawpin chhanchhuah hna hi thawk sela, chutih rualin ram danga hnathawh tum te pawhin tunhnu zel atan fimkhur phah nan hmang ngei teh ang u.