DOWNLOAD OUR APP

Read latest news on your phone
app-store

EDITORIAL : Fimkhur reng a pawimawh

Dec 18, 2022

Hri kai lo tura mipuite pawh kan fimkhur reng a pawimawh rualin hri kan kai anih pawhin midang ten an kai ve lohna tura hma kan lak zel hi mitin mawhphurhna a ni tih hre thar reng ang u

Mizoram chu hun engemaw chen hripui Covid-19 in min chenchilh hnu leh kan nunphung pawh nasa taka a tihbuai hnuah tunah chuan hrivei awm lohna state kan ni ta a. Kan buailai ngaihtuah chuan hetiang hun kan thlen pawh hi a rinawm loh hial zawk a, mahse Pathian khawngaihna a zara hetiang hun kan thleng thei hi thil lawmawm tak a ni.

Zirtawpni pawh khan sample 68 enfiah leh a ni a, Covid-19 hrikai hmuh a ni lo a. Hripui in min chenchilh vanglai kha chuan nunphung engkaim mai kha a buai a. Chhungkhat pawh awmkhawm thei lovin quarantine centre ah te kan awm a ngai a. Kan thu hriat tam ber pawh fimkhur a ngaih thu a ni a. Sample enfiah ah hri kai chuti zat hmuh a ni tih te, chumite chhung chu khung hrang (quarantine) an ni tih te, lockdown tih te chu kan thu hriat tlanglawn a ni a. Heng hnamdang tawng te hi Mizo tawng ang maia kan hriat bel te an ni. Mahse tunah erawh kum 1 leh ni 562 zet a liam hnu-ah Mizoramah Covid-19 vei mek kan awm ta lo hi thil lawmawm tak a ni.

January ni 20, 2020 khan China atanga passenger lo haw te Lengpui Airport-ah screening tih tan a ni a, chawlh awm lovin hmalakna chak taka kalpui chhoh a ni a, heti a nih lai hian March ni 24, 2020-ah Covid-19 Positive hmasa ber pakhat Mizoramin a nei ve ta a, May ni 5, 2020-ah enkawl dam hmasa ber ni turin dam takin damdawi in atangin a chhuak leh a ni. Hemi hnu ni engemaw chen chu Positive enkawl lai leh a thar kan neih belh loh hnu in June ni 2, 2020 ah positive 12 Mizoram chuan a neih belh leh a, hei hian mipuite a thawngin kan chiai hle anih kha. Hemi hnu atang hi chuan Positive enkawl lai an awm chho ta char char a, ni 927 alo liam meuh chuan Mizoramah positive enkawl lai kan awm ta lo a ni.

Hripui do kawngah pawh mahni theihna zawn theuhah theihtawp chhuah tlan a ni. Hei hian rah tha a chhuah a, India ram state ah chuan a mipui cheng ngaihtuahin Covid-19 vanga nunna chan tlem ber state kan nih phah a ni. Chumai ni lovin hripui vanga inkharkhip neih anih lai pawhin thingtlang lam ten an chawhmeh leh thlai thar te khawpui lamah an pe a. Aizawl lam pawhin buhfai leh thildangah te an pui bawk anih kha. Heti tak maia mipuite tanrualna hian rah tha a chhuah a tih loh theih loh a ni.

Hetih mek lai hian Covid-19 hri hi chu a la awm reng avangin inthlahdah mai erawh a thiang lo a ni tih hriat nawn fo a pawimawh a. Hri kai lo tura mipuite pawh kan fimkhur reng a pawimawh rualin hri kan kai anih pawhin midang ten an kai ve lohna tura hma kan lak zel hi mitin mawhphurhna a ni tih hre thar reng ang u.

Share now