Kumin hi ruah sur vangin khawro lutuk kan la tawng lo a. Kum dang ngaihtuahin ram lang pawh a tlem niin a lang. Hetih lai hian in kang mai ni lovin mihring thihna hial te a thleng tawh a, tunhnaiah pawh in kang hriat tur a awm leh ta zeuh zeuh a, a pawi hle.

Sawi tawh angin ruah a sur zeuh zeuh avangin thal khawro lutuk kan la tuar lo a. Kum dangah chuan tun ang hunah hi chuan khua a lumin awm hleih theih loh khawpa sa te a ni a. Chumai ni lovin ram kang hmun engemaw zatah a awm tawh thin a ni. Mahse ruah a sur tak zeuh zeuh avangin khua pawh a la lum lutuk lo a, ram kang awm thleh thluah pawh a la ziaawm hle.

Hetih kara in kang hriat tur a awm leh thin hi a pawi hle a, mitin te fimkhur a ngaih zia tarlangtu pawimawh tak a ni. Kangmei chhuah chhan tam ber chu a chhan hriat loh a ni a, a chhan hriat loh hi electric kalsual ah kan puh deuh zel bawk. A dik leh dik loh hre turin electric lah chu zawh ve theih a ni si lo a, a buaithlak hle.

Engpawhnise kangmei awm chhan hi electric kalsual a ni emaw, ar vulhna atangin a ni emaw bati chhemhlum loh atang leh thildang atang pawhin nise a bul berah chuan fimkhur tawk loh vang zel a ni. In kanga kan bungrua leh document pawimawh te a kangral thin hi chu a rapthlak tak zet zet a ni.

April thla kan hmang chho tan mek a, khua pawh a la thal chho dawn tan chauh niin a lang. Chuvangin mitin te kangmei chhuak lo tura kan tan tlan a pawimawh hle. Kangmei hi amah chauha lo awm ni lovin mihringte vang a ni a, vanduaina kan tawh zozai te ngaihtuahin mitinin kangmei ti chhuak lo tura tan kan lak a pawimawh hle.

Inchhirna a thlen loh nan te, chhiatna leh vanduaina thlen loh nan te tun atang hian tan la ila, kangmei vanga vanduaina hi kan fimkhur phawt chuan kan pumpelh thei a ni tih hre thar leh ang u.