India leh Myanmar ramria cheng te hi hnam khat kan ni a, Britist sawrkarin ramri a then dawn khan ramri thendan remchang nia a ngaih angin a then tawp mai a. Chuvangin unau ni si kha a then Burma lamah a then India ah, a then Bangladesh ah te kan awm darh ta nuai mai a ni. Mahse unau kan nih miau avangin sawrkar laipui chuan Free Movement Regime (FMR) tih vuahin ramri a cheng te chu Visa ngai lovin ramri atanga KM 16 thleng inkalpawh theihna dan a siam a. Hei vang hian ramri a cheng te chu zalen takin kan inkalpawh theih phah a ni.

Hetih lai hian sawrkar laipui chuan January ni 2,2024 khan Mizote tana thu thinthawng tak mai a puang a, chu chu FMR tih tawp tum anih thu leh India leh Myanmar ramri hung tum anih thu hi a ni. Free Movement Regime hnuaiah hian ram pahnih thuneitute chuan visa ngai lovin kum khat chhung dam tur phalna an siam sak a, hemi hmang hian zalen takin phalna nei te chu an zin thei a. FMR vang hian ramri a cheng te zalen takin an insumdawn tawn thei a, nupui pasal innei tawnin hnam khat te chu kut ni vang thla pawh an hmang ho thei a ni.

India leh Myanmar ramri hung tum leh FMR tihtawp tumna hi Mizo mipuite chuan kan duh lo hle a. CYMA, MUP, MHIP, MZP leh MSU telna NGO Coordination Committee chuan ramri hung tumna leh inkalpawh theihna thiah a tum chu duh lo in hma an la a. Hei mai ni lovin Parliament Budget Session neih tur inbuatsaihnaa sawrkar laipui hotu thenkhat leh MP rual hmaah Mizoram MP K.Vanlalvena pawhin Indo-Myanmar ramri hung a duh loh thu a sawi. Mahse heti chung hian tunhnai maiah Union Home Minister Amit Shah chuan ramri hung chu kaltlangpui anih tur thu leh Free Movement Regime pawh tih tawp anih tur thu a puang nawn leh a. Heti anih chuan Mizo mipuite duh dan kalhin sawrkar chu a che dawn ta niin a lang a, kan duhlohna kan aupui thin te pawhin awmzia a nei lo tih a chiang hle a. 'Kel-a be be mah la ka talh dawn tho tho che' tih ang mai kan ni ta.

Hun kal tawh leh kal mek han en hian sawrkar laipui hian Mizo mipuite duh dan tih hlawhtlin hi a ngai pawimawh lo hle tih chiang takin a lang a. Citizenship Amentmend Bill leh thildangah te pawh kan duh dan ai chuan an duh dan a lal char char mai anih hi. Heti zela sawrkar laipui hi a kal anih chuan nakin lawkah chuan kan inhumhimna kulhpui 'Inner Line Permit' te pawh hi an la ngaimawh ngei dawn a, chuvangin tun atanga lo inbuatsaih lawk hi kan tih tur pawimawh tak niin a lang.