India ram hi tunhma atangin chi inthliarna leh hnam hnuaihnung zawkte nepchepna leh hmuhsitna hmuna awm kan ni a, heng hnam tlem zawk ten dinhmun sang leh tha zawk an chelh ve theina turin an tan hamthatna chi hrang hrang a siamsak a. Chung an tana quota siamsak an nih vang hian dinhmun tha zawk tam tak an luah theih phah a ni.

Sawrkar laipuiin heng dinhmun sang an luah theihna atana quota a siam zingah hian state sawrkarin a remtih hnua hman theih chauhte pawh an awm a. Tunhnai sawi hlawh tak leh inhnialna titam em em tu zinga mi Gorkhali te Other Backward Classes a dah leh dah loh chungchangah pawh hian sawrkar laipui lama zirchiangtu Mandal Commission chuan Mizorama Gorkha-te pawh OBC a tel tur hian a rawt a, mahse state sawrkar remtihna tel lo chuan hman ngawt theih a ni lo a ni.

Mizoram sawrkar kal tawh leh tuna sawrkarna chelh mek te pawh hian an rilru tak chuan Gorkhali te hi OBC quota pek mai an duh/remti niin a ngaih theih a, chutih rual chuan tlawmngai pawl lam atangin duhlohna leh venthawn ngai thil a awm nia hriatna avangin sawrkar pawhin ngawih a la chuh leh niin a lang. Tlawmngai pawl-te hian sawrkar laipui hnuaia Gorkhali te tan OBC quota dah sak a, an tan hnalaknaa 27% hauh sak hi an do ngawr ngawr niin a lang lo a. Nakin zelah hei hian thil tha lo hrin chhuah a nei ang a, Gorkhali-te hian sawrkar laipui hnuai mai ni lo, state sawrkar hnuaiah pawh quota hi an la beisei a, chutih hunah chuan thutlukna eng emaw a lo awm tawh chuan state sawrkar hnuaia hna laknaah an tan 27% hi hauh sak zel a ngai dawn a. Hei mai ni lovin MLA, Local Council/Village Council inthlanah pawh an tan seat reserve ve zel a tul ang tih an hlauh vang a ni. NGO-te thlirna leh hlauhthawn hi thil awm tak a ni a, Gorkhali te hi an khawngaih lo tihna ni lovin nakin zela thil awm thei an ngaihtuah vang zawk a ni.

Kawng lehlama ngaihtuah chuan kum 1950 hma lama Mizorama cheng leh khawsa Gorkhali hi mi 8000 pawh an tling tawh lo a, pun lam aiin kiam lam an pan zel zawk emaw tih theih a ni. Heng mite tana sawrkar laipui hna laknaa 27% hna lo hauh sak ve hi thil awm tak a nihna chen a awm a ni. Gorkhali te tan hian 27% hi hauh sak pawh ni ila Mizoram Gorkhali te chan vek tur a ni lo a, hmun hrang hranga OBC te nen an la inel leh chauh dawn a, a thiam zinga an tel chuan lak an ni ve dawn tihna a ni chauh a ni. Mizoram Gorkhali te hna hauhsaka an tel loh lai hian hmun dang atangin OBC quota hmang hian hnam dang an rawn lut tho a, mi thil chikmi thenkhat phei chuan Meitei an lut hnem hle niin an sawi. Gorkhali te OBC a puan leh puan loh chung­changah sawrkarin ngaihtuhna fim tak pu in thutlukna a siam thuai turah beisei phawt ang.