Kan hma lawkah kristiante hunpui pahnih krismas leh kumthar kan thleng leh dawn a. Chhungkaw tin ten hlim taka hman kan duh vek thin a, hunpui lo hmuahna atan chhungkaw tam tak chuan mahni in leh a velte an chei a, kawn leh hmun remchang lai chei pawh hmuh tur a awm tam hle. Hunpui lo thleng thinah hian a bikin kumthar anih chiah hian halpuah leh halmawi hal a tam hle a, hemi zan ringawta hetiang tihna atana kan sum sen hi chhut ila a tam viau ang.

Halpuah hi engtik atanga kan hal tan nge tih leh engvanga hal ve nge kan nih hriat a har hle a, engpawhnise kan chenpui Hindu sakhaw zuitute tih kan lakchhawn anih a rinawm. Halpuah hi Chinese ho chin chhuah niin an sawi a, anni hian thlarau sual hnawhchhuahna atan an hal thin niin an sawi. Halpuah ah hian damdawi (chemical) lam chi engemaw zat a tel a, heng zingah hian mihring leh ran tana hlauhawm tak tak pawh a awm a ni. Mi thil chikmite chuan kumthar hlimah hian halpuah hal vangin Ar an pul deuh ngei ngei niin an sawi.

Sawrkar leh tlawmngai pawlte hmalaknain halpuah leh halmawi hal loh kumte pawh a thleng hman hial a, mahse a khaptu sawrkar berin engemaw phalrai hun an neih zeuh atang khan kum tin khap ve bawk mahse awmzia a nei tlem hle. Kuminah hian sawrkar leh tlawm­ngai pawl lam chuan theihtawpin halpuah leh halmawi hal lo turin mipuite an ngen a, Police lam pawhin kumtir atanga hma lain dan zawm lova halpuah kawl mi engemaw zat an man tawh a ni.

Kumthar puala halpuah hal hi damlo, naupang leh tar chaklote tan chuan tuar a hrehawm hle a, an huphurh ngawih ngawih zel a ni. Hetih lai hian Aizawl khawpuiah halpuah leh halmawi hal lohna veng engemaw zat a awm a, an fakawm thlawt a ni. Damlo, nunau leh tar chaklo tam tak chu halpuah hal lohna vengte an pan hial thin a ni. Kan hlimna leh nuam tih zawng hian midangte tan harsatna a siam em tih hi inenlet fo a pawimawh.

Halpuah leh halmawi chungchangah hian kumtir lam atangin sawrkarin hma a la tan a, kuminah hian team engemaw zatah insiamin hal lui chu thubuai siamsak zel an tum a. Khua leh tui tha kan nih chuan sawrkar thupek zawm hi kan tih tur a ni a, chutiang bawkin sawrkar pawh hian khauh takin thupek kenkawh kawngah tan la se a duhawm hle. Kan tana tangkaina awm miah lo, sum leh pai tam tak senna, midang tana harsatna siamtu ni bawk halpuah leh halmawi hi kumin atang chuan hal lo thei ila a duhawm hle.