Mizoram sawrkar leh tlawmngai pawl tangkawp te chuan tunhnai kum engemaw kalta atang khan Mizoram mipuite chu Krismas leh kumthar vuatvetah halpuah, halmawi leh silai lem, a mu kapchhuak thei te hal leh hmang lo turin an ngen thin a. Krismas leh kumthar kalta ah pawh khan tlawmngai pawl te chuan ngenna siamin sawrkar pawhin khapna thupek a ti chhuak a. Mahse heti chung hian zawm a hlawh lo hle a, hei hian ngaihtuah a ti thui hle mai.

Halpuah leh a kaihhnawih hi kan pi leh pu atanga kan chin tan ni lovin hnamdang te atanga kan chin chhoh niin a lang a. Sakhaw thenkhat chu an sakhua nen a inzawm nia ngaih theihin an uar hle a ni. Mahse hetih laia keini Kristian sakhaw zuitu ten kan uar ta viau mai hi a mak hle awm e.

Mizo mipuite hi thuawih thei tak kan nih laia heti tak maia sawrkar leh tlawmngai pawlte ngenna in zawm a hlawh lo hi thil mak tak a ni awm e. Police lam pawhin theihtawp chhuahin lirthei lo lut turte dapin dawr hrang hrang te enfiah mahse lirthei lut zawng zawng dap sen a ni lo a, dawrkai te pawhin an thuhruk duh chuan an thukru thei bawk a. Police lam tan pawh hmalak sen a ni lo a ni. 

Halpuah leh halmawia kan sum sen tam turzia ngaihtuah phei chuan keini ang state rethei tan phei chuan uiawm tak a ni a. Chu aia pawi zawk chu damlo, tar chaklo leh naupangte thlabara kan siam kha a ni. Kumthar lawmawm tak mai nghakhlel em ema kan thlir laiin damlo, tar chaklo leh naupang te chuan he hunpui lo thleng tur hi an huphurh em em a. Damlo thenkhat chauh zualpui te awmin mi thenkhat phei chuan an in leh lo te an riah chhuahsan hial a ni. Halpuah leh halmawi haltu tam zawk hian midang dinhmun thlir chunga harsatna an thlen te ngaihtuah chunga thlirna tarmit dang an vuah ve a tha hle.

Halpuah leh halmawi chungchanga sawrkar leh tlawmngai pawlte ngenna in awmzia a neih loh avang hian mi tam tak chuan khap tawh loh mai te an rawt hial a, hei hi thil awm tak nia a lan rualin thil tha lo chu khap chhunzawm zel tur niin a lang zawk. Zu leh ruihhlo te pawh khap a ni chungin rui tawk an awm reng a, mahse khap ni ta lo se chuan hei ai hian kan chhiatpui zawk dawn a, chuvangin mi tlemte in an zawm anih pawhin khap chhunzawm zel hi sawrkar leh tlawmngai pawlte tih tur a ni zawk. Chutih rualin sawrkar leh tlawmngai pawlte hian engvanga an ngenna hi mipuite hian zawm tha lo nge an ni tih ngun zawka ngaihtuah chunga mipui hneh thei zawk tura ruahmanna tha zawk zawngchhuak thei se a duhawm hle.