Home Minister Lalchamliana hova mi pawimawhte tunhnaia thukhawm chuan kumin Krismas, Kumthar leh Puja (Diwali leh a dangte) lo thleng turah halpuah, halmawi, silailem mu nei chi leh sky lantern khap nise tiin an rel a. Dan anga khapna thupek tihchhuah a nih veleh sawrkara dan leh thupek kengkawhtu ten hma an la tan nghal dawn a. Chutiang bawkin, veng hrang hrangah tlawmngai pawl te leh Local Council te pawhin anmahni zawn theuhah hma lak tan nghal ni se, tiin meeting ah hian rel a ni.

Kum engemaw zat kalta atang khan sawrkar chuan krismas leh kumthar vuakvetah hian halpuah, halmawi leh midang te tana hnawksak ang chi te a lo khap tawh thin a. Mahse he khapna hian zawm a hlawh lemlo thin a, hei hi a chhan ber chu dan bawhchhiate an phu tawka hrem an nih thin loh vang niin a lang.

Kum danga krismas leh kumthar vuakveta halpuah leh halmawi khap a ni chunga zawm a hlawh loh chhan pakhat chu sakhaw dang bia ten an hunpui Diwali leh a dangte an hman laia khap a ni ve lo te, heng hunlaia duh tawka halpuah leh halmawi an hal theih laia Kristian te hunpuia khap a ni bik chu mi tam takin an hriatthiam loh vang te a ni a. Kumin ah erawh chuan Diwali ah pawh khap a ni a, hei vang hian kum dang ai chuan sawrkar ngenna hian awmzia a neih zawk ngei a rinawm.

Halpuah leh halmawi chi hrang hrang te hi kan pi leh pu atanga kan chin than ni lovin kan chhehvela hnamdang leh sakhaw dang bia te atanga kan chin chhoh zui niin a lang a. Chuvangin tih tak zeta khap anih chuan mipuite pawhin an zawm ngei a rinawm. Halpuah leh halmawi chi hrang hrangte hian sum leh pai a heh em em a, hetiang thil leina atana kan sum senral hi nuai tam fe a ni. Chutih laia sum tam tak kan seng chunga ho taka sum an kalral hi chu a uihawm ngawih ngawih a, thildang tangkai zawkah hman nise kan changkan phah ngei a beiseiawm a ni.

Chumai bakah damlo, nunau leh mi tam takte thlabara siamtu a ni a. Heng hunpui te hi damlo thenkhat chuan an huphurh ngawih ngawih a, chauh phah hial te an awm bakah damlo thenkhat phei chu hmundanga insawnchhuak hial te pawh an awm a ni. Chuvangin kan hunpui hi nunau leh damlo te manganna leh tih thlabarna hun atan kan hmang thei a ni tih hria in hal loh mai hi a him a ni. Khua leh tui tha kan nih chuan sawrkar thupek zawm hi kan tih tur a ni.

Kum danga halpuah leh halmawi chi hrang hrang hal khapna in awmzia a neih tawk loh chhan ber hi sawrkarin a bawhzui chak tawk thin loh vang niin a lang a. Sawrkar hian dan bawhchhia te chu manin hrem hmak hmak se chuan midangte pawh a titim ang a, tun ai hian mipuite pawhin an thlawp ngeiin a rinawm e.