Kumin kum tawp lamah harsatna dang a awm anih loh chuan Mizoram chuan MLA inthlanpui kan hmachhawn dawn a. Political party hrang hrang te pawhin sawrkarna chan ngei tumin theihtawp an chhuah a, tum danga la tih ngai zen zen loh an candidate tur te pawh inthlan puan hma hauh atang tawhin an tifel der tawh a ni.

Hetih karah hian sawrkarna chelh mektu party pawh an tang hle a. Media chi hrang hrang te hman tangkai dan pawh an dap chho mek zel a, kawng hrang hrangin theihtawp an chhuah chho mek a ni.

Sawrkarna chelh mektu ten an hmalakna leh hnathawh that tarlanna atan tunhnai hun engemaw chen atang khan pisa thar leh thildang hawn an uar hle mai a. Tunkar kalta leh kar hmasa chho lamah pawh engemaw zat hawn a ni a, tunkar chho ah pawh an la hawng zel dawn niin a lang.

Hetia sawrkarna chelh mektu ten thil hawn an uar hle hian hma an la chak a ni tih lantir an tum ber niin a rinawm a. An sawrkar chhunga building an sak emaw, khawi office thar emaw an hawn te chu inthlan campaign au hla atan an duh vang anih a rinawm ber.
    Sawrkarna chelhtu ten an sawrkar chhunga pisa thar an hawng emaw hmasawnna hnathawh zawh tawh an hawn hian hna an thawk chak tih a entir a, thil tha tak a ni. Chutih rual erawh chuan tunhnaia sawrkarin a bik taka ditrict tharah te pisa a hawng nasa lutuk erawh a fuh tawk lo niin a lang. Thil hawn tam hi inthlana tlin leh tlin lohna a ni lo tih chu tuna sawrkarna chelh mektu te hian an sawrkar hmasak tawp dawn a district an puan khan a ti chiang viau awm e. 

District office hrang hrang an hawn te hi hmasawnna anih rualin thawktu indaihlohna avangin heng pisa thar te hian hna thawk dawn tak tak se harsatna an tawk nghal dawn tihna a ni. Sawrkar hnathawk indaihlohna avangin pisa hawn tharah te hian thawktu 2/1 chauh te dah an ni a, an tan pawh hnathawh a buaithlak hle ang tih a rinawm. Department hotute pawh an lu a hai hle nia sawi a niin pisa hawn anih chuan khawi atangin emaw staff an pawtkhawm lo thei lo a, hei hian an hnathawh kawngah harsatna a siam niin an sawi. Chuvangin sawrkar hian pisa hawn hi uar lovin lovin hnathawk thei ngei tura an inpeih hunah chauh hawng se a fuh zawkin a rinawm e.