Mizoramah Zoram Peoples Movement sawrkar a lo dinin a hmaa an intiamna angin thlaithar thlanchhuah bik pali sawhthing, aieng, hmarchha leh hmunphiah ah te hmalak a, heng thlai thar te hi lei an tum thu an sawi a. Aieng, hmarchha leh sawhthing ah chuan harsatna awm lovin kuthnathawktu ten an thlai thar chu man to takin an hralh a. Mahse hmunphiah bikah erawh sawrkar tum anga thil a kal tak loh avangin harsatna a thleng ta a. Assembly session kal mekah pawh tum engemaw zat sawichhuah tawh a niin Zirtawpni kaltaa private resolution sawihona ah pawh hmunphiah hralhna chungchang hian sawi a hlawh hle.

Heti tak maia hmunphiah in kan ram rorelna in sang ber ngaih pawimawh a hlawh hi a lawmawm a. Kan ram hruaitu ten kuthnathawktute an hmangaihzia pawh a lantir awm e. Tarlan tawh angin ZPM chuan an sawrkarna an chan chuan thlai thar lei ngei an tum thu hi an sawi a. Chief Minister Lalduhoma pawhin sawrkarna an chan tirha chanchinbumite a kawmnaah pawh thlai chi li ah te hian hmalak an tum thu a sawi a. Chumai ni lovin Assembly tan ni ah pawh Governor chuan House ah a sawi leh bawk a ni. Governor leh Chief Minister meuhin hetia an sawi avang hian mipui pawhin beiseina an nei sang hle a ni.

Mahse heti chung hian a tak taka hma an lak takah chuan hriat lawk loh harsatna lian tak a lo thleng ta a. Hmunphiah ching an lo tamin a leitu tur erawh firm pakhat chauh an ni si a, an tan Mizorama hmunphiah chu lei zawh sen rual a ni ta lo a. Kum danga an hralhna aia tlawm daih zawkin hralh a lo ngai ta a, kuthnathawktute chu beidawngin an awm ta a ni. Kum dangah chuan mahal system in kalpui thin a ni a, hei hi a tha lo nia hriain sawrkar thar hian tih tawp a tum a. Mahse an beisei lo angin thil a kal ta niin a lang.

Kuthnathawktute hian sawrkar tharah hian beiseina an nei sang hle a, thlai thar lei leh kuthnathawktute hamthatna tur budget a DAH an intiam avangin thuneihna pawh an chantir a ni. Hmunphiah lei chungchangah hian sawrkar lam pawhin an duh angin thil a thleng lo tih an pawm a, ruahmanna tha zawk an siam a ngai hle. Hmunphiah seng hun a tawp mai dawn avangin kumin chu tihngaihna a awm tawh lo ah ngai ila, chutih lai chuan kumina kan harsatna tawh hi kumthar atan inbuatsaihna atan hmang ila. Tuna kuthnathawktu ten harsatna an tawh hi sawrkar hian inzirna atan hmang se, kum thar lamah chuan ruahmana tha leh fel fai zawk siam ngei teh se.