Naktuk Thawhtanni hi khawvel puma ruihhlo do leh tawlhruk dona ni 'International Day against Drug Abuse and Illicit Trafficking' a ni a, he ni hi Mizoramah pawh hman tum a ni bawk.

Ruihhlo hi khawvel ram tin hian kan buaipui a, Mizoramah pawh kan buaipuiin sawrkar, kohhran leh khawtlang in kan do a ni. Mahse heti chung hian do rem aiin a pung tual tual emaw ni tih mai tur a ni a. Dan leh thupek kengkawhtu hrang hrang te chuan nitin man tur an nei reng a, kumin chhunga an man ringawt pawh cheng vaibelchhe tel man a tling tawh a ni.

Ruihhlo hian sualna chi hrang hrang a kengtel a, rukruk leh sualna dang a tipung a. Kohhran hoten camping buatsaihin khawtlanga ruihhlo lama harsatna nei te chu Home lamah te dah bo thin a ni a. Kan ram ngaihtuahin Home ngah ber state kan nih hial a rinawm a, chuti chungin a khat reng a, enkawl sen loh enkawl tur an awm reng bawk.

Ruihhlo ngeiawmna em em pakhat chu natna hlauhawm tak tak a keng tel hi a ni. Ruihhlo hian HIV/AIDS mai bakah Hepatitis te a keng tel tlat mai a, ruihhlo ngai zingah vei an tam em em a ni. Heng natna chi hrang hrang hi inchiuna hriau inhmantawm atanga an kai a ni ber a, chuvangin ruihhlo ti thin te hian hriau thianghlim an hman a pawimawh tih a entir chiang hle.

Mizoram State AIDS Control Society chuan NGO te kaltlangin damdawi ti thin te hnenah hriau thianghlim hi sem a ni thin a, hei hi mipui lam hian la man thiam lovin lo chhuhsak mai leh tihchhiatsak te ching kan la awm a, a pawi hle. MSACS te hian damdawi ti thin te hi inchiu turin an duh a ni lo a, an pek vanga inchiu ta ni lovin an inchiu vanga hriau thianghlim hi pe an ni zawk. 

Hriau thianghlim lo hman avang hian HIV mai bakah Hepatitis kai hi an tam em em mai a, chuvangin natna khirhkhan tak tak laka kan fihlim theih nan damdawi ti thin ten hriau thianghlim an hman hi thil pawimawh tak a ni. Mithiam ten an zirchianna ah pawh hriau thianghlim sem hian natna kaidarh tur tam tak a veng a ni tih an hmuchhuak bawk a. Chuvangin kan rama natna hlauhawm chi hrang hrang darh zel tur a ziaawm nan hriau thianghlim pek kawnga kan rilru hi tihzau a pawimawh tih hrethar teh ang u.